‘Uluaki Mālohi Faka-holomamata Utah Warriors, 39-33 Featured
Kapakau 'a e Utah Warriors, Fetu'u Vainikolo (#11) ko 'ene lele-tata'o mei honau laine mita-10 kakalo mei he kau foueti 'a New Egland, pea ne kalofi 'a e haafe, passé loi ka e kalo mei he feesi, mo e le'okolo. (Faita: D. Wilson).
‘Uluaki Mālohi Faka-holomamata Utah Warriors, 39-33
Fa‘u ‘a Sione Ake Mokofisi
Las Vegas (Feb. 15, 2020): Taha e manavasi‘i ‘a pule-faiko Chris Latham, na‘a kuo anga‘aki ‘e he ‘ene Utah Warriors, ‘a e faka-moleki e mālohi´ ‘i he faka-‘osi‘osi ‘a e va‘inga´. Pea tenau fokimai, 0-2, ‘i he uike hono ua ‘o e fe‘auhi ‘a e US Major League Rugby.
“‘Oku mau ‘amanaki lelei lahi ‘aupito atu ki he tau ‘o e uike´ ni, he na‘a mau fakatooki pe kimautolu, tautau tefito ki he miniti ‘e 20 faka ‘osi´,” lau ‘ia ‘a Latham ‘i he ‘enau takikai, 19-10, ka e tulikai hake pe ‘a e ATL Rugby ‘o nau mālohi, 28-19, ‘i he uike ‘uluaki´.
Kuo tu‘ofiha ‘ene sio ‘i he ngaahi me‘a tatau´? “‘Oku mau tokanga lahi ai ‘i he uike´ ni ki he fatongia takitaha faka-fo‘ituitui ‘a e tokotaha kotoa,” hokoatu ‘a Latham. Mahino mai ai na‘e lahi ‘a e ngaahi fehālaaki faka-fatongia ‘o mole ai honau faingamālie´.
Malimali e “Fefine Foaki-monū” (Lady Luck)
Pea nau toe kamata fefeka ‘o hangē ko ‘enau taki-kai ‘i he uike ‘uluaki´mei he sū ‘aka fakahū ‘o e feesi-5/8 Hagen Schulte (#10). Ko ‘ene ‘aka tautea ‘e ua, mo e ‘aka faka-ului (conversion kick) ‘o e tata‘o ‘a kapakau Fetu‘u Vainikolo (#11) ‘o nau taki-kai ai, 13-12, ‘i he mālōlō´. Na‘e fili ai ‘a Vainikolo ki he ‘Uluaki Timi XV ‘o e Uike Ua´.
Mei he laine-auti ‘a e Warriors (miniti 28) ‘i he vaeua‘anga ‘o e mala‘e´.
Na‘e ha‘u ‘a e paasi´ kimui ki he kapakau to‘ohema´ Vainikolo ‘i he vaha‘a ‘o e laine mita-10 mo e laine mita-50. Na‘e ‘ohomai ‘a e foueti ‘a New England ka e fana‘i hake ‘a e kapakau´ ‘i he vaha‘a ‘o e laine mita-5 mo e laine kitu‘a´.
Na‘a ne kalofi ‘a e haafe ‘a New England, pea paasi loi ki loto ka e kalofi ‘a e feesi, pea tōmui ‘enau le‘okolo´ ki he laine-tata‘o´ ka e afemai ‘a Vainikolo ‘o tata‘o ofi ki he kolo-fakahū.
Pea kamata malimali ‘a e “Fefine Monū‘ia´” mei he ngaahi kasino´ ‘o Las Vegas ki he Warriors.
Nofo Tailiili ‘i he Konga Ua´
Ka e hangē ha vitiō mei he ‘uluaki uike´, ‘a e tata‘o tu‘o ua hokohoko ‘a New England ‘o nau ‘alu hake ‘o taki, 26-13, ‘i he kamata ‘a e tu‘u hono ua´. Pea toki kamata ai ‘a e lau ‘e he Warriors honau ngaahi monū´. Na‘e kaati engeenga ‘a e tokoua ‘a New England ‘o kamata ai ‘a e loloatu ‘a e ‘oho-kai ‘a e Warriors.
Mei he sikalamu mita-5 ‘i he tuliki to‘omata‘u´ na‘e lele‘i ai ‘e Kapiteni´ Dwayne Plolatiavao (#9) ‘o tata‘o ‘i he tuliki-fuka´. Na‘e hala ‘a e ‘aka faka-ului ‘a Schulte (#10), ka e toe fokimai pe ‘a e va‘inga´ ki he molo ‘i he tuliki-fuka tatau ‘o to‘o ai ‘e Schulte ‘a e pulu´ ‘o tata‘o mei he mita-5.
Pea teke‘i ‘e he foueti´ ‘a e molo ‘a e talilavea ko Saia ‘Uhila (#20) mei he laine mita-5 ki he laine tata‘o´. Na‘e hū kotoa ‘a e ngaahi ‘aka faka-ului ‘a Schulte ‘o nau ‘alu hake ‘o taki-kai, 32-26. Pea tāpuni ai ‘a e matapā ‘e he Warriors ‘i he ‘enau ‘ohokai-fakafoki mei honau mita-22.
Kamata ‘e he kapakau-3/4, Gannon Moore (#14), ‘o kakalo holo ki he mita-10 ‘o New England, ‘o ne paasi mai ki loto ki he le‘okolo´ Josh Whippy (#15), fokiatu kia Moore ‘i he tapa‘i laine,´pea fokimai ki he talilavea ko Michael Baska (#21) ‘o ne tata‘o ai. Na‘e toe tata‘o faka‘osi ‘a New England pea toki ‘osi ‘a e taimi´ ka kuo malu ‘a e taki-kai ‘a e Warriors, 39-33.
Week #2 Results
Utah Warriors 39 - New England 33
ATL Rugby 22 - New Orleans 10
San Diego 49 - Colorado Raptors 22
Washington DC 28 - Seattle 22
Toronto 27 – Houston TX 22
New York 49 - Austin TX 31
Week #3 Matches
Utah Warriors @ Austin, TX
Washington @ Houston, TX
Toronto @ Seattle, WA
New York @ ATL Rugby, GA
New England @ San Diego, CA
New Orleans @ Denver, CO
