Taki ‘e Ma‘a Nonu Fakalakalaka US-MLRugby Featured
Ko e sekeni-5/8 Dylan Audsley (#11) ‘o e San Diego Legion mo e pulú mei he avangi ‘e Ma‘a Nonu (tu‘ulutui mei mui) ‘enau ‘oho-kai faka‘osí, pea toki tēkolo‘i ‘e he ongo malu‘i kolo ‘a Seattle. Pea ‘ave ai ‘e Audsley ki he loka Jasa Veremalua (#6) ‘o ne lele‘i ki he laine tata‘ó. (Faitā: Griff Lacey/San Diego Legion).
(Na‘e fakaava he ‘ahó ni ‘a e ta‘u tolu ‘o e ‘akapulu ‘iunioni polofesinale U.S. Major League Rugby (US-MLR) ‘o e kalapu ‘e 12, kaumai ki ai ‘a e Toronto Arrows mei Kānata.)
San Diego, California USA – (Feb. 9, 2020): Kuo sauni ‘e he kalapu ‘a Ma‘a Nonú (San Diego Legion), 33-24, ‘enau fo‘i mamahi ‘i he Seattle Seawolves mei he tau-hau ‘o e US Major League Rugby (US-MLR) ‘o e 2019. Ko e ta‘u ua hohoko eni ‘a e fakaaoao ‘a Seattle ‘i he MLR ‘o ‘Amelika Tokelaú.
Kā kuo tū‘uta mai ‘a Nonu (#12) ‘i he ta‘ú ni ‘o faka‘ali‘ali ko e kalapu San Diego Legion ‘e mate ilifia ‘a e ngaahi kalapú kehé mei he mama‘ó kimu‘a ‘oku te‘eki ai kenau fepaki. Neongo ‘a e fefeka ange ‘a e taki ‘a Seattle, 10-0, ‘i he kamata ‘a e konga ‘uluakí, na‘a nau toki mamata tonu ki he taukei ‘a Nonu mei hono ta‘u lahi ‘i he All Blacks ‘a Nu‘usilá, kau ai ‘a ‘enau ikuna‘i e Ipu ‘a Māmaní tu‘o uá.
“Na‘e ‘ikai ha‘á ne feinga ke lele ‘o ‘asi tokotaha, ka ‘okú fakamanamana ma‘ú pē ‘a ‘ene lele-pulú, paasí, mo ‘ene ‘aka fakatō,” lau ia ‘a Rob Hoadley faiako pule ‘o e Legion,.
“Na‘á ne tufotufa lelei ‘a ‘emau pulú ki he kau va‘ingá ‘o ne avángi e ngaahi faingamālié. Ko e tata‘o ‘a Save Totovosau (#14) ko e ngaahi me‘a ia ‘oku toki ‘asi ai ko e tangata va‘inga All Blacks ‘a Nonu,” Ko Hoadley ia.
Tu‘unga ia ‘a e tuli kai hokohoko ‘a e Legion ‘o nau taki, 19-10, ‘i he mālōlō. ‘I he lele faka-holo mamata ‘a Nonu na‘e tata‘o ai ‘a Totovosaú, ko ‘ene avangi ‘o ‘asi hake ka e faka-fihia‘i ‘e he ongo malu‘i kolo ‘a Seattle ‘o tēkolo‘i ai. Ka e faka-‘ohovale kuó ne fana‘i atu ‘a e fo‘i paasi kia Totovosau ‘i he tapa‘i lainé, vaha‘a ‘o e laine vaeuá mo e laine mita-22 ‘o Seattle.
Na‘e ‘ohofi ai ‘e he kau malu‘i kolo ‘a Seattle ka na‘e kakalo holo pe ‘a e Fisí (fute 6-5, pāuni 219) ‘o a‘u ki he laine tata‘ó. Na‘e toe avangi ‘e Nonu ‘enau ‘oho-tata‘o faka‘osí ‘o e taú. Ko ‘enau kai hokohoko poini ia ‘e 33 ‘o fakalongolongo‘i ai ‘a Seattle; ko e kamata mei he paasi loi ‘a Nonu ka e hū ‘o fafanga‘i ‘a e sekeni-5/8, Dylan Audsley (#11), ‘o ava hake ‘a e loká, Jasa Veremalua (#6),‘o ne lele‘i ki he koló.
Ko e kau va‘inga Tonga ‘e toko tolu ‘i he San Diego Legion: Faka‘osi Pīfeleti (#1); Siaosi Māhoni (#4); Tevita Tāmeilau (#8). Pea toko taha ‘i he Seattle Seawolves: Vili Toluta‘u (#6).
Hokomai e uike uá ki he San Diego Legion mo Ma‘a Nonu ko e Colorado Raptors. Tenau fakataha ki Las Vegas mo e ngaahi kalapu ‘o e MLR ‘i he Tokonaki mo e Sāpate, (Feb. 15-16).
Ola ngaahi fe‘auhi ‘uluaki uiké: Houston, 21 – Colorado, 12; New Orleans, 46 – Washington DC, 13; Atlanta, 28 – Utah, 19; New England, 34 – New York, 14; Toronto, 38 – Austin TX, 10.
Fa‘u ‘a Tod Leonard, San Diego Union-Tribune
Liliu lea Tonga ‘a Sione Ake Mokofisi
