Foaki pale pa'anga ki he kau ikuna mētali ‘i he Sipoti ‘a e Pasifiki 2019 ^Featured

Na’e fakamālō’ia ‘e he ‘Eiki Palēmiá ‘a e mātu’a tauhi fānaú kae pēhē foki ki he Kōsilio Sipotí (Sports Council), TASANOC mo e kau faiakó ‘i he ngāue lahi kuo fakahoko ke lava ‘o ma’u ‘a e ola lelei ‘i he fe’auhí.

“’Oku ‘oatu ‘eku fakamālō makehe heni ki he ngaahi mātu’á, ngaahi mātu’a na’a mou teuteu’i ho’omou fānaú ke nau fakahoko ‘a e ngāue ko eni ‘oku tau fiefia ai. Me’a pango pē ‘oku ‘ikai ke nau si’i ‘i heni ka ‘oku ou tui ‘oku nau fanongo mai mei honau ngaahi ‘apí. ‘Oku ‘oatu ‘a e fakamālō ‘a e pule’angá, he kapau na’e ‘ikai ke mou poupou’i ho’omou fānaú, ‘ikai ke mau tui kimautolu te tau a’usia ‘a e ola ko ení.”

‘I ha lea mei he fakafofonga ‘a e timi sipoti ‘a Tongá Mosese Foliaki ‘a ia na’a ne ikuna ‘a e mētali kuola ‘e ua ‘i he fe’auhi puna mā’olungá mo e lele hētolo mita 110 na’a ne fakamamafa’i ‘a e kaveinga ‘a e timi ‘atelita ‘a Tongá, ‘Ko e ngata’anga ‘o e tangatá ko e kamata’anga ia ‘a e ‘Otuá.’

“’I he’etau lava me’a ko ia ‘i loto mala’é, ‘i he’etau fakamālohi sinó, mou fai ki he ‘osi’osinga mālie ‘ete feinga ‘oku faí kae lava ke kamata ‘a e ‘Otuá. Kapau ‘e ‘ikai kete fai fakamātoato’i ‘ete fakamālohi sinó ‘e ‘ikai kete ma’u ha ola ‘oku lelei.”

Na’a ne poupou foki ki he fānau sipotí ke ‘oua tenau loto si’i pe manavahē he ko e ‘Otua ‘o e me’a kotoa ‘oku fakahoko ki ai ‘a e hūfangá.

“’Oua ‘e loto si’i, sio kimu’a pea ngāue’i e ki’i talēniti na’e ‘oatu ‘e he ‘Otuá, pe ‘e toe hanga pē ‘e he ‘Otuá ‘o toe tufotufa atu ha ola ‘oku toe lelei angé.”

Na’e ‘i he polokalama ni ‘a e Talafekau Lahi ‘a ‘Aositelelia mo Nu’u Sila, kau Minisita ‘o e Kapinetí mo e kau fakaafe.