Laka he 1 miliona kātoanga misinale SUTT Leimātu’a Featured
'Oku hā he ta ko'eni 'a Fotu, Rev. Viliami Ngahe (Faifekau 'o e Fungasaione) Rev. Dr. Tevita Koloa'ia Havea, Rev. Lauhingoa Finau, Sea 'o e Katoanga Fatai Veikoso pehe ki he'ene fanau mo e ni'ihi na'a nau kau atu ki he kātoanga ni.
24 Tīsema, 2018. Kuo a’usia ‘e he tukumu’oui ‘i he ngaahi siasi fakakolo pe koe ngaahi talāsiti fakakolo ‘a e Siasi Uesiliana Tau’atāina ‘o Tonga ha ‘epoki fo’ou ‘i he lahi ‘o e pa’anga kuo foaki ‘i ha kātoanga tukumo’ui.
Na’e foaki ‘e he kainga ‘o Fotu ‘i he Halamangaono mo e Fungasaione ‘i Leimatu’a ha pa’anga ‘e taha miliona, fāmano, nimaafe, onongeau ma tahanima (TOP$1,045,615 – 00) 'i he'enau kātoanga tukumo'ui ‘i he ‘aho Tokonaki 22 ‘o Tīsema ‘a ia koe Tokonaki ia ‘o e uike kuo ‘osi.
Ko e kātoanga ko’eni na’e fakahoko ‘e he Sekelitali Lahi ‘a e SUTT Rev. Dr. Tevita Koloa’ia Havea pea sea ‘a e taha ‘o e kau toulekeleka ‘o e siasi ko e fine’eiki ko Vatai Veikoso pea na’e me’a ai pe foki mo Fotu pehe ki he Siasi ‘o e Halamangaono.
‘I ha me’a ‘a e Faifekau Sea malōlō ‘o e Vahefonua Vava’u Rev. Lauhingoa Finau ka koe Faifekau malōlō ‘o e Siasi ‘o Fungasaione ‘i Leimātu’a lolotonga ‘a e katoanga na’a ne fakamahino ai koe taketi ki he 1 miliona na’e fokotu’u pe ‘e Fotu ki he kainga ‘i he hili ‘a e kātoanga tukumo’ui ‘o e 2017 ‘a ia na’e fe’unga mo e fitukilu tupu pea na’e fai hono lotua mo hono ngāue’i ‘e he kaingalotu ‘o e Fungasaione.
‘Oku lolotonga fakahoko foki ‘a e ngāue langa fakalelei ‘o e falelotu ‘o e Fungasaione ‘i Leimātu’a 'a ia na'e talu hono langa 'i he ta'u 1960 tupu pea koe ‘uhinga tefito ia ‘o e taumu’a ‘o e kātoanga tukumo’ui ko’eni.
‘I ha me’a ‘a Sekelitali Lahi ‘a e SUTT Rev. Dr. Havea na’a ne fakamatala ai koe fuofua a’u ‘eni ha misinale ‘a ha siasi fakakolo pe talāsiti fakakolo ki he miliona ‘i he hisitōlia ‘o e Siasi mo e lotu ‘i Tonga ni pea koe makamaile ia kuo fokotu’u ‘e he Halamangaono.
‘Oku hoko foki ‘a e kava Tonga koe ma’u’anga mo’ui tefito ia ‘a e kolo ni pea koe ngaahi ‘aho ni foki ‘oku ‘i ‘olunga ‘a e maketi ‘o e kava pea koe tapuaki lahi ‘eni ki he kakai ‘o e kolo ni.
Kaikehe ‘i ha me’a ‘a e ‘eiki ‘o e kolo Fotu ‘i hono fakamālō’ia ‘a e ngāue lahi mo faka-hisitōlia kuo lava na’a ne pehē ai ‘oku ‘alu fakataha pe ‘a e tapuaki kuo tō ki he kelekele mo e loto ‘aki pea ‘oku tumu’aki’aki ‘a e ‘ofa ki he ‘Otua mo e lotu.
Na'a ne toe me’a foki ‘o pehe ‘oku ‘ikai koha me’a fo’ou ‘a e mafana ‘a e kainga ‘o tatau pe he tapa kotoa ka ‘oku hiliō ‘a e lotu.
Ko e faifekau 'o e kaingalotu 'o e Fungasaiaone ko Rev. Viliami Ngahe.
1 comment
-
Kuo to e tapuaki he kainga ko'eni ko honau fa'ahinga loto 'o talu pe mei tuai 'a e loto mafana mo e foaki 'i he fonua mo e lotu.