Fokotu’u Tākanga Kau Taki Lotu Tonga ‘i Nu’usila Featured
5 Sepitema, 2017. Koe’uhi ke nau fetakinima ‘o langa hake ‘a e mo’ui fakalukufua ‘a e kakai Tonga, kuo fokotu’u ai ‘e he kau taki lotu ‘e toko 15 ‘a e ‘uluaki tākanga ‘a e kau taki lotu ‘i he ta’u ‘e 50 ‘o e hiki fonua ‘a e kāinga Tonga ki Nu’usila.
“Kuo ta’u taha ‘emau fai fatongia, ka kuo toki lava eni hono lesisita ‘emau konisitutone,” ko e fakamatala ia ‘a e Sea e tākanga ko Faifekau Tevita Finau, pea ko e Sea ‘o e Vahefonua Tonga, Siasi Metotisi ‘o Nu’usila.
“Neongo ‘a e matu’aki vivili e ngaahi faingata’a lalahi ‘oku fehangahangai mo e kakai Tonga he ngaahi tapa mahu’inga e nofo hangē ako, mo’ui lelei, ma’u ngāue mo e nofo’anga, ‘oku taumu’a e tākanga ke tokoni ki he kakai Tonga ‘aki hono ‘ave honau le’o ki he Pule’anga,” ko e fakamatala ia ‘a e Sekelitali ko Sione Tu’itahi, ko e Fakafofonga ‘o e Kāingalotu ‘o e Tui Baha’i ‘i Nu’usila.
“‘Ikai ko ia pe ka ke mau fetokoni’aki mo e kau Tonga ‘oku taki he ngaahi mala’e hangē ko e ako, mo’ui lelei mo e ma’u ngāue, ke fatu e ngaahi kaveinga mo e founga ngāue fakataha mo hotau kāinga,” ko e fakamatala ia ‘a e sekelitali.
‘Oku fakafofonga’i he tākanga ‘a e ngaahi siasi pe tui ‘e 15.
‘Oku kau ai e Vahefonua Tonga ‘o e Siasi Metotisi ‘o Nu’usila, Siasi Uesiliana Tau’ataina ‘o Tonga, Kominio ‘o e Kaingalotu Tonga ‘o e Siasi Katolika, Siasi ‘o Tonga Tau’ataina, Siasi Fakatahataha ‘a e Kakai Tonga, Siasi ‘o Tonga, Siasi Konisitutone Tau’ataina ‘o Tonga ‘i Nu’usila, Siasi ‘o Sisu Kalaisi mo e Kau Ma’oni’oni ‘o e Ngaahi ‘Aho ki Mui ni (Mamonga), Siasi ‘Ahofitu, Siasi Penitekosi, Siasi ‘Ingilani, Tongan Wesleyan Church of New Zealand (Upper Room Centre), Lotu Baha’i, Amatakiloa Gospel Church, Blessed Hope Christian Centre, mo e Pacific Island Evangelical & Missionary Network.
Na’e pehē ‘e he Sekelitali ‘oku ‘atā pē ki ha siasi ‘o e kakai Tonga ‘oku te’eki mēmipa ke kau mai ki he tākanga, he ko e kaveinga ke ngāue fakataha ki he lelei ‘a e Tonga kotoa.
