Maloloo ha tamai ko e melemo i Vaipua
Na'e maloloo ha tamai ko Tevita Seluini Tu'itupou ta'u 55 'o Taoa Vava'u mo Tofoa Tongatapu ko e melemo hili ia ha'ane feinga ke kaufaki'i hono uaifi pehe ki hono foha 'i he potutahi 'i he Halafakakavakava Vaipua 'i he efiafi Monite ko hono 19 Sanuali 2015 fakafuofua ki he taimi 4:00 pm efiafi. 'Oku pehe na'e hopo 'a e pekia ki tahi ko'ene kaukau tahi pea ne fakaafe'i ai hono foha pehe ki hono uaifi kena puna ki tahi ke nau kaukau fakatatau ki he fakamatala 'a e Pule Polisi Vahefonua Vava'u Netane Falakiseni. Na'e puna heni 'a e uaifi (Tupou Tu'itupou) mo e foha (Kulu Tu'itupou) pea ma'u tokua kinaua 'e he 'au pea na'e feinga leva 'a e pekia ke fakahaofi kinaua 'o ne pekia ai pe makatu'unga 'i ha'ane fu'u hela'ia.
'Oku lea'aki foki 'a e Halafakakavakava Vaipua 'i he'ene fakatu'utamaki ki he kaukau tahi pea kuo tokolahi 'a e kakai kuo nau pekia 'i he kongatahi ko'eni. 'Oku toe 'i ai foki mo e papa fakatokanga 'oku fakatokanga ki he fakatu'utamaki 'a e feitu'u ni ki he kaukau tahi.
Na'e fakaha 'e he Pule Polisi Vahefonua Vava'u Netane Falakiseni 'e fakahoko 'a e ngaue faka'osi ki he me'a ni 'a e ma'u mafai kimu'a pea fakafolau 'a e pekia ki Nuku'alofa. Ko Tevita Seluini Tu'itupou na'a ne lolotonga fakakaungatamaki 'i he Poate Vahenga Maloloo 'a Tonga.
Source: Kaniva Pacific-Tonga
