Ngaue Sima ‘i ‘Aositelelia koe Tapuaki ki he Kainga Tonga ^Featured

Na’e a’utonu ‘a e ongoongo ‘a e Nepituno ‘o mamata tonu ‘i he fakahoko fatongia ‘a e tamaiki Tonga pea hā mahino mei ai 'a hono falala’anga ‘a ‘enau ngaue mo e toe ‘i he levolo fakapolofesinale foki.

‘Oku angamaheni ’aki pe foki ‘a ‘etau ‘ilo ki he ngaue ‘iate hotau kainga ‘i Hauaii mo ‘Amelika mo e lahi ‘o e ngaahi ngaue sima ‘oku nau fakahoko ‘o kau ai ‘a e ngaahi driveway ka koe tu’unga ‘oku ‘i ai ‘a e ngaue ‘a e tamaiki Tonga ‘i Senee ‘oku ‘i he tu’unga ma’olunga he ‘oku a’u ‘enau ngaue ki he ngaahi fale lalahi ‘o a’u pe ki he fungavaka 10 ki ‘olunga. ‘Oku toe fakapoto foki mo e ngaue ‘oku nau fakahoko ‘o ‘ikai toe kehekehe ia moe ngaue ‘a e kau konitulekitoa ‘oku nau fakahoko ‘a e ngaahi langa pehe ni ‘i he tafa’aki kehekehe pe.

‘Oku toe fakafiefia koe malava kenau fakangaue’i ‘a e si’i kakai ‘oku nau fakapaea mai mei Tonga ki he Konitineniti ‘o ‘ikai ngata he ma’u ‘a e pa’anga kenau si’i foki moia ki Tonga ki si’onau ngaahi famili takitaha ka ‘oku toe kau lelei foki ki he ‘ikonomika ‘o e fonua. ‘Oku lahi foki ‘a si’otau kainga ‘oku nau nofo’ova pehe ki he kau folau ‘eve’eva fakataimi pe ki ‘Aositelelia ‘oku nau ma’u faingamalie ke nau kau atu ki he ngaue sima ‘a ia ‘oku fakalele pea mo tataki pe ‘e he kakai Tonga ‘oku nau fakanimamaka ‘i he fa’ahinga ngaue ko’eni.

Na’e ma’u tonu foki ‘e he ongoongo ‘a e Nepituno ‘a e fakamatala falala’anga ‘oku a’u pe ki he pa’anga ‘e 200 ‘Aositelelia ki he pa’anga ‘e 300 ‘Aositelelia ki he ‘aho ‘oku ma’u 'e he tokotaha ngaue leipa mei he fa’ahinga ngaue ko’eni ‘e he tokotaha tukukehe ange ‘a e pa’anga ‘oku ma’u ‘e he kau Konitulekitoa Tonga. Fakatatau ki he fakamatala ‘a e tokotaha hotau kainga Tonga koe folau’eve’eva pe mei Tonga ka ‘oku ‘ikai loto ke fakahā hono hingoa na’a ne pehe koe fakakoloa ‘a e monū ko’eni pea koe fa’ahinga ngaue ‘oku ‘ikai lahi ka ko’ete poto pe he ngaue pea ‘oku nomolo pe ‘o ’ikai ha fu’u hela.

Na’a ne toe fakamalo’ia ‘a e ‘ofa si’i kakai Tonga ‘oku nau fakahoko ‘a e fa’ahinga ngaue ni ‘i he’enau fakangaue’i kinautolu ‘o malava ai ke fakakakato ‘a e ngaahi fiema’u lahi ‘i Tonga. ‘Oku ‘ikai ngata foki ‘a e kaunga lelei ‘a e ngaue ni ki hono langa hake ‘a e tu’unga ‘o e nofo hotau kainga ‘i ‘Aositelelia ni ka ‘oku toe tokoni pe foki ki si’o tau kainga ‘oku lava mai mei Tonga koe kumi si’a faingamalie ma’a honau ngaahi famili” koe fakamatala ia ‘a Hingano Fonua koe taha ‘o e kau ngaue sima ‘i Senee.

‘Oku kau foki ‘a e tokoni hotau kainga Tonga mei muli (remittances) he pa’anga lahi ‘oku tokoni ‘o ‘ikai ngata he ngaahi famili fakataautaha ka ‘oku toe kau lelei foki ki he vilo ‘a e pa’anga ‘i he ‘ikonomika ‘o e fonua. ‘Oku kau ‘a ‘Aositelelia he fonua na’e ‘ikai uesia ‘e he fakatamaki faka’ikonomika fakamamani lahi pea ‘oku kei ‘i he tu’unga lelei ‘a e fakapaea ai si’otau kainga Tonga.