Fakaafe Fakataha Mītiá, Palēmiá, Komisoni Polisi mo e Konisela Siainá Featured
Fakaafe Fakataha Mītiá, Palēmiá, Komisoni Polisi mo e Konisela Siainá
Fa'utohi 'a Sione A. Mokofisi
Nuku‘alofa – Na‘a mau lele atu ‘aneafi ki he Tanoa Hotel, 4:00 PM, ko e fakaafe mai mei he ‘Ōfisi ‘o e Palēmiá (PMO). Na‘e fetu‘utaki mai ‘a e PMO ‘i he 11:30 AM, meia Po‘oi Pōhiva kemau maau ange ‘i he 3:30 PM ki he fakanofonofó. Na‘e fakaafe mai kemau ō ange ko e fakataha mahu‘inga.
Ko e fakataha mahu‘inga eni ‘a e Palēmiá mo e Konisela Siainá ‘o kau ki he lāunga ‘a e kakai Siaina-Tongá ki hono faka-tanga‘i, mo faka-mamahi‘i kinautolu ‘e he kakaí Tongá. Pea mau lele atu ke ma‘u ha ongoongo ‘o kau ki he talateu na‘e ‘osi ‘omai ‘e he kau Polisí ‘o kau ki he palopalemá ni ‘i Fepueli.
Na‘a mau faka-tu‘amelie atu kemau fanongo pe koehā e ola ‘o e fakatotolo ‘a e kau Polisí kuo fai ki he palopalemá ni. Pea kemau ako foki mei he faka-fofonga ‘o e kakai Siainá ‘i Tongá ni, ‘o kau ki he ngaahi lāunga ‘a honau kakaí.
Hala ‘Emau Ma‘ú, Tā Ko e Fiema‘u Faitā pē
Tā ko e fiema‘u pē ‘e he Palēmiá kenau faitā (photo opportunity) mo e kau Siainá pea tulimai kimautolu ki tu‘a ka e fai ‘enau fakatahá. Na‘e ‘i ai mo e Komisoni Polisí, kau inisipekita Polisi, Palēmiá, mo e fu‘u kau ngāue tokolahi ‘a e Konisela Siainá.
Na‘a mau ongo‘i kuo mau hangē ha kau valé kuo fakaafe‘i mai, pea ‘osi pē kamosi honau ngaahi ‘atā pea kapusi mai kimautolu ki tu‘a. Ko e ngata eni ha‘akū ia teu toe ‘alu ki ha fakaafe mei he ki‘i foha ngāue faka-pone ‘o e Palēmiá. Ko eni kuo ‘i ai hono tu‘unga fo‘ou: Fetu‘utaki Faka-mītiá.
‘Oku nau fai ‘a e me‘a lahi ‘i he founga kākā, ke faka-‘uakai‘i mai kimautolu, kau faiongoongó, tokua ‘oku ‘i ai ‘a e fakataha mahu‘inga kemau kau ange ki ai. Hili ko iá, ko ‘enau fiema‘ú ke faka-‘aonga‘i ‘a e mītiá ke hoko ko e loungutu ‘o e PMO.
(Ko Sione A. Mokofisi ko e Talēkita English, Journalism & Business Management ‘i he Tonga International Academy, Nuku‘alofa. Ko e taukei faiongoongo ‘i he mītia ‘Ameliká mo Tongá ni foki, ko e ‘ētita ‘o e nusipepa Niuvākai. ‘Oku pulusi foki ‘ene ngaahi fa‘utohí ‘i he ngaahi Peesi Ngaluopé.)
4 comments
-
MĀLŌ FALEAFĀ, MO MŌLINI...'Oku 'ikai ko e fanga ki'i fānau ako GPS 'a e mītiá ke poupou'i 'a e fakamàtalá kotoa mei he Pule'angá. Na'a mou ifo'ia 'i hono fakaanga'i 'e 'Akilisi Pōhiva 'a e ngaahi pule'anga 'o e kuohili. Kā ko'eni 'oku 'ikai kemou loto ke fakaanga'i 'a e Palēmiá mo 'ene Kapinetí.
'Oku te'eki ai ke 'omai 'e he Pule'anga ko 'eni ha fakakaukau fakalakalaka kemau poupou ki ai, Ko e fanga pone pe 'a e Palēmiá 'oku nau poupou kuikui. 'Oku mau fokifokihi mo e fisifisi'i 'a e "propaganda" mei he 'Ōfisi 'o e Palēmiá.
Kātaki ke mo 'omai ha fo'i fakakaukau 'e taha: Kuo mole 'a e 'a'ahi tau tesi mei Uēlesi he ta'ú ni, pea 'oku ta'e pau 'a e Sipoti 2019.
'Oku nau vili kikihi ke langa 'a e mala'e tāpulu ka 'oku tokosi'iange 'ae kakai tāpulu 'o Tongá ni 'i he 1% 'o e fonuá. Hili ko ia, 'oku 'ikai ketau lava 'o tauhi ha mala'e 'akapulu 'e taha ko 'etau sipoti manakoa tahá, pea hala mo e mala'e netipolo ma'a e kakai fefiné. -
Fe'unga pe ia mo koe Mofini 'a e poupou kuikui. 'Oku 'i ai si'emau fakaukau moe fo'i me'a hinehina homau 'ulu ke mu fakakaukau pea mau toki poupou ki he me'a 'oku mo'oni mo lelei.
-
Mou kataki ka mou poupou malohi kihe pm ka tau mau ha lelei he kuo pm ia pe koe toe kenu atu ke fefei
-
Temou poto pe kau faingoongo! Oku mou osi ilo koe letio 87.5 pe a Katalina Tohi koe elelo moe loungutu ia oe Ofisi Palemia kamou kei alu pe kihe fakaafe pehe na. Ka ikai pe nae ikai ke fetaulaki e talanoa ia a Pooi moene Tamai. Ka ikai pe nae ngalo ia he Tamai a Pooi nae iai ene fiemau pehee hhhhh iooo maalie kuo tau alu tautolu he highway he taimi ni