Hoha'a he Fili Kau Talekita ki he Poate Fakatahataha’i ‘o e Sekitoa Fefononga’aki. ^Featured

Tofoa

11 Me, 2016

‘Etita,

Kataki mu’a kae tu’u atu ho’o kolomu ‘eku hoha’a ko’eni ki he founga na’e fili’aki ‘a e kau Talekita ki he Poate Fakatahataha’i ‘o e Sekitoa Fefononga’aki. ‘Oku makatu’unga ‘eku hoha’a he ‘oku ‘ikai keu fiemalie ki he tokolahi ‘o e kau Talekita kuo fili. ‘Oku mahino mai foki kuo fakahoko ‘a e fili ‘e he Minisita ki he Ngaahi Pisinisi ‘a e Pule’anga pea faka-paasi ‘e he Kapineti pea fili ai ‘a:
1.    Sitiveni Edwards
2.    Tu’itupou Fotu
3.    Viliami Takau Jr.
4.    Tomifa Paea
5.    Heleni Toli

Ko e katoa ‘o e kau Talekita ko’eni ‘oku fai e faka’apa’apa kiate kinautolu ka ‘i he anga ‘eku vakai ko Sitiveni Edwards pe ‘e taha ‘oku ‘i ai ‘ene taukei ‘o makatu’unga he ngaahi ngaue natula tatau na’a ne fakahoko ki mu’a pea ta’u lahi ‘ene taukei. Ko hono toe ‘oku nau fo’ou pea ‘oku fehu’ia foki mo e ngaahi tu’unga taukei mo ngaue ‘i he mala’e ‘o e pisinisi ke malava ai kenau ‘oatu ha okooko ‘oku fe’unga ki hono langa hake ‘o e sekitoa ko’eni.

‘Oku tokolahi ‘a e kakai ‘oku ‘ikai kenau mo’ua ki he ngaahi pangike mo e Pule’anga pea nau taukei ta’u lahi he pisinisi na’e mei lelei ange ke fili kinautolu ki he ngaue mamafa ko’eni ka ‘oku faka’ohovale hono fili ‘o e ni’ihi ko’eni.

‘Oku fai e faka’apa’apa lahi kiate kinautolu ka ‘oku fiema’u ke aka ha’anau fu’u manioke ‘i hono langa hake ‘a e fonua ‘i he sekitoa ko’eni pea kapau na’a nau fakalele pisinisi pea na’e ‘ilonga ‘oku tupu mo mo’ui ka ‘oku ‘ikai ko hono puke ‘e he pangike pea lahi moe mo’ua kae fili kinautolu ia kenau faka’uto’uta ‘i hono tataki ‘a e sekitoa mahu’inga ‘i he fonua.

‘Oku ‘osi mahino pe ki he tokolahi ‘a e kau Talekita ‘oku ‘uhinga atu kiai ‘ e fakahoha’a ni pea ‘oku tau ‘amanaki ‘e malava ‘e he Kapineti ‘o fakamavahevahe’i ‘a e fili pone mei he fili ‘o taumu’a ki he langa fonua.

Faka’apa’apa Atu,

Mamahi’i Fonua