Lahiange Tu‘unga‘á (panic) ‘o e COVID-19 ‘i he Fokoutuá: U.S.A. ^Featured

Salt Lake City, Utah (Mā‘asi 14, 2020) – ‘Oku te‘ekiai mālōlō ha tokotaha ‘i he vahefonuá ni neongo kuo ‘osi fokoutua ‘a e toko nima (5) ‘i he COVID-19. Kuo laka ‘ihe toko 1,600 ‘a e puké ‘i ‘Ameliká ni kotoá, mo e toko 51 kuo nau si‘i mālōlō. Kā ‘oku fakailifia ange ‘a e tau-felēlēaki holo ‘a e kakaí ‘ihe faka-tu‘unga‘a (panic) ‘o e mahaki pipihí ni.

Kuo hoko ‘a e ngaahi fuhu mo e fetā‘aki ‘a e kakaí ‘ihe ‘enau tu‘u laine fakatau ‘ihe ngaahi falekoloá. Kuo ‘auha ‘a e ngaahi koloa ‘e ni‘ihi ‘i hono fakatau ‘o fetuku ‘e he kakaí ke fa‘oaki honau ngaahi feleokó. Kā ‘oku ‘ikai mahino pe ko e hā ‘oku lahitaha ai hono fetuku ‘o e pepa fale-mālōlō? ‘Oku ‘ikai kau ‘a e fakalelé ‘i he ngaahi faka‘ilonga fokoutuá ‘o e COVID-19.

“Tu‘unga‘a” pe Manavahē Ta‘e‘uhinga?

‘I he lea Tongá ko e “tu‘unga‘á” ‘oku faka-manavahē pea faka-tu‘upakē ta‘e ‘i ai hono ‘uhingá, pē tupu‘angá. Ko e tokolahi ‘o e U.S.A. ‘oku 350 milioná, pea ko e toko 51 pē kuo nau mālōlō mei he COVID-19. ‘I he tu‘u faka-pesetí (%), ko e peseti pē ia ‘e 0.0000000146%; ‘oku te‘ekiai ofiofi ki he peseti ‘e tahá (1.0%).

Pea neongo ‘oku tokolahiange ‘a e maté ‘i Siainá mei he COVID-19, mo e ngaahi fonua ‘o hangē ko ‘Itali, Iran, South Korea, etc., na‘e lahitahá ‘a e ‘ikai kenau mateuteú. ‘I he Konga II ‘o ‘eku fa‘utohi kau ki he faito‘o ‘o e mahaki pipihí ni, ‘oku te‘ekiai pe ke ma‘u ha faito‘o huhu-ta‘ofi (vaccine) kuo ngaohi ‘e ha kautaha hu‘i faito‘ó (pharmaceuticals).

‘Oku ‘i ai ‘a e ‘amanaki lelei ki he kautaha NOVAVAX, Inc., ‘e mateuteu ‘enau faito‘o huhu-ta‘ofí ki he konga kimui ‘o e kuata hono ua ‘o e ta‘ú ni. ‘Oku lahi mo e ngaahi kautaha hu‘i-faito‘o 'i māmani kotoa ‘oku nau fe‘au‘auhi.

Tuai Mateuteú Mei he Faka-politikalé

Mei he kamata‘anga ‘o e mafolamai (outbreak) ‘a e COVID-19, na‘e kovitahá ‘a e faka-politikale‘i ‘e Siainá, mo e ta‘e tokanga ‘a ‘Ameliká. Kuo pulusi ‘e he nusipepa South China Post News (Josephine Ma; 13 Mar, 2020) mei he ‘enau faka-mā‘opo‘opo ‘a e ngaahi lekooti ‘a e Pule‘angá Siainá: Na‘e fūfū‘i ‘e he Pule‘anga Siainá ‘a e kamakamata mai ‘a e mahakí talu mei Nōvema 17, 2019.

Pea na‘e toki fakahā ki he World Health Organization (WHO) ‘i Tīsema 19, 2019. Lolotonga iá, kuo kaka hake ‘a e kau fokoutuá ki he toko 381 ‘i he ‘aho ‘uluaki ‘o e ta‘ufo‘oú, 2020. Ka e fakalilifu ko e tāngata‘i ‘e he kau Polisi ‘a Dr. Li Wen Liang ‘i he Falemahaki Wuhan, na‘á ne ‘uluaki faka-mafola 'i Tīsema ‘a e kāinga ‘a e mahaki fo‘oú ni ki he mahaki pipihi ko e SARS ‘i he 2002. Pea si‘i pihia aipē ‘a Dr. Li ‘i he COVID-19 ‘o mālōlō.

Lotonga ení, kuo mo‘umo‘ua ‘a ‘Ameliká ia ‘i he feinga‘i faka-politikale ‘e he Paati Temokalatí ke faka‘ilo ‘a Palesiteni Trump – kamata mei he Tisema 18, 2019, ‘o faka‘osi ki he Fēpueli 5, 2020. Ka e ‘i he Sanuali 31, 2020, na‘e kamata ai ‘e Trump ‘a e ta‘ofi ‘o e ngaahi folau tū‘uta mei Siainá, 'i he fakalalahimai ‘a e mafola ‘a e COVID-19 ‘i māmaní.

(Hokoatu Konga IV ‘amuiange).