Mahalo'i kuo 'i Tonga ni 'a e mahaki faka'auha koe Kolonavailasi ^Featured

'I ha fakataha mo e kau faiongoongo 'i he 'aho ni na'e talaki fakafonua ai 'e he 'Eiki Palemia pehe ki he 'Eiki Minisita Mo'ui 'oku 'i ai 'a e ha finemui ka 'oku 'ikai fakaha hono hingoa 'oku mamahalo'i neongo 'oku te'eki fakapapau'i kuo ma'u 'e he mahaki fakalilifu ni.

Ko e finemui ko'eni fakatatau ki he ngaahi fakamatala 'oku ta'u 21 mei Fasi Mo e Afi pea na'e folau mai mei 'Aositelelia 'i he pongipongi Monite 'o e uike ni.

Na'e fakahoko hano talatala ki he Falemahaki Vaiola pea fakahoko hano sivi 'o mahino mai 'oku 'i ai 'a e ngaahi faka'ilonga 'oku matamata 'oku tatau mo e faka'ilonga 'oku ma'u 'e ha taha 'oku ne ma'u 'a e mahaki ni.

'Oku toe mahino mai mei he fakamatala 'i he fakataha mo e kau faiongoongo 'oku kei fakahoko e ngaue ke 'ave 'a e ngaahi sivi 'o e finemui ni na'e fakahoko 'i he Falemahaki Vaiola ke fai hano toe sivi fakapapau mai mei Nu'usila ka e toki fakapapau'i.

'Oku tapou 'a e ma'u mafai ki he fonua kenau toe tokanga ange pea ke faka'ehi'ehi mei hano ma'u kinautolu 'e he mahaki ni pea 'i he taimi tatau 'oku fakahoko pe 'a e ngaue 'a e Pule'anga mo e mateuteu ke talia ha hoko mo'oni 'a e fakaevaha ni 'i he fonua.

Kuo 'i ai mo e ngaahi tu'utu'uni kuo tuku mai ke fakangatangata 'a e fefolau'aki mo e tu'uta mai 'a e ngaahi folau vakatahi mei muli ki he fonua ni.