Huufi Senitā Mo’ui ma'a Ngele’ia ^Featured

‘I ha polokalama ne fakahoko ke faka’ilonga’i ‘aki ‘a e ngāue ni, na’e fakahā ai ‘e he Fakafofonga Fale Alea ‘o e Vāhenga Tongatapu 3 Siaosi Sovaleni na’e ‘i ai pe ‘a e Senitā Mo’ui ‘i NGele’ia he ngaahi ta’u kuo mahili atú.

Na’a ne pehē foki ko e senitā fo’ou ni ‘e tokoni lahi ia ki he kāingá, he ‘oku ofi, ‘a ia ‘e lava ke fakahoko ki ai ‘a e “talatala puke, sivi suka, na’a mo ha kilīniki suka, ngaahi nifo, sivi feitama kae ‘uma’ā ‘a hono faito’o ngaahi lavea hangē ko ia ‘oku fa’a lavelavea ai ‘etau fānau akó.”

“’Ko e sitepu mahu’inga eni ki mu’a he tau feinga ke toe mo’ui leleiange hotau kaungā fonongá.”

Na’e fakahā ‘e he ‘Eiki Minisitā Mo’uí Toketā Piukala ‘oku mahu’inga ‘a e vā fengāue’akí koe’uhí kapau na’e ‘ikai e vā fengāue’akí ‘e ‘ikai ke ‘i ai ha senitā faka’ofo’ofa pehe ni.

“Ko e taha e vīsone ‘a e potungāué ‘i he ‘alunga ko ení pea ko e me’a ia ‘oku malanga’i fakamāmani lahi ke ‘oua ‘e li’ekina ha taha. Pea hangē ko e me’a ‘a e Fakafofonga ‘o Tongatapu 3 ko e palopalema ‘emau ngāué mo e fakahoko homau ngaahi fatongiá ko e ‘ikai ke ‘i ai ha feitu’u kemau fakahoko fatongia aí pea ‘oku ou tui ‘oku hoko ‘a e ‘aho ni kene ne faka’āa’i e mata ‘o e potungāué ke fakamo’oni’i ‘oku ‘ikai li’aki ha taha pea ‘oku monū’ia ai ‘a Tongatapu 3.”

Na’a ne fakamamafa’i foki ‘a e fekau “’E tu’umālie ‘a e fonuá kapau ‘e mo’ui lelei ‘a hono kakaí.”

Na’e fakamālō’ia foki ‘e he ‘Eiki Minisitāʹ ‘a e Pule’anga Siainá ‘i he ngaahi tokoni kotoa pē kuo nau fakahoko ‘o kau ki ai ‘a hono fa’a ‘omai ‘a e timi kenau tokoni ki he kau ngāue ‘a e Falemahaki Vaiolá, ko hono ‘ahia tu’o ua ‘e he vaka fakafalemahaki Peace Ark ‘a Tonga ni ‘o lava ai ke talatala ki ai ‘a e kakai e fonuá, ko e foaki mai ‘a e ngaahi me’a ngāue ki he falemahakí pea mo hono ‘omai ‘a e ngaahi faingamālie ako ma’a’e fānau Tongá.

‘I he taimi tatau na’e fakahā ‘e he Amipasitoa Le’ole’o ‘a Siaina ki Tonga ni Yang Zhaohu ‘oku mahu’inga ‘aupito ‘a e mo’ui lelei ki he taha kotoa ka ‘oku ‘ikai ke mo’ui lelei ‘a e taha kotoa pē tupu pea mei he ngaahi fakafe’atungia ‘i he ngaahi tafa’aki kehekehe.

“’Oku mau ‘ilo ‘a e si’isi’i ‘a e ngaahi naunau fakafalemahaki ‘i Tonga ni pea ‘oku ‘i ai pe ‘a e faingamālie ke fakalakalaka ai ‘a e tafa’aki ni.

Ko e Senitā Mo’ui ‘a NGele’iá ko e taha pe ia ‘i he ngaahi loki ako ‘i he Tonga Side School na’e fakalelei’i ‘i he tokoni ‘a e Pule’anga Siainá ke hoko ko e senitā mo’ui.

Na’e kau atu ki he polokalamá ‘a e Pule Ngāue ‘a e Potungāue Mo’uí Toketā Siale ‘Akau’ola, Pule Ngāue ‘a e Potungāue Fonuá mo e Saveá Rosamond Bing, Kau ‘Ofisa Mā’olunga mei he Potungāue Mo’uí mo e kau fakaafe kehe pē.

- MEIDECC