Tō ‘a e mofi tengi pea ‘i ai mo e pekia ‘i he fonua Featured
30 Sanuali, 2018. Kuo talaki faka’ofisiale ‘a e tō ‘a e mahaki mofi tengi ‘i he fonua hili ia ‘a e malōlō ‘a e ki’i ta’ahine mei Nu’usila ‘i Tonga ni.
Ko e ki’i ta’ahine ta’u 12 ko’eni na’a ne ‘a’ahi mai ki hono famili ‘i Tisema lolotonga ia ‘a e ngaahi ‘aho malōlō kilisimasi.
Kuo fakapapau’i foki mei he Talēkita Mo’ui Dr. Siale ‘Akau’ola ko e toko 19 ‘eni kuo nau mo’ua ‘i he fokoutua ko’eni.
Kuo ‘osi fakahoko foki ‘a e fakatokanga mamafa ‘a e Potungāue Mo’ui ki he kakai ‘o e fonua kenau toe tokanga ange ‘o faka’ehi’ehi mei he namu pehe ki he ngaahi ‘api kuo ‘i ai ‘a ‘a honau ni’ihi kuo puke he mahaki ni.
‘I he taimi tatau fakatatau ki he fakamatala ‘a ‘Akau’ola kuo ngāue atu ‘a e Potungāue ki hono tufotufa atu ‘a e ngaahi tainamu pehe ki he ngaahi faka’ahu namu ki he kakai ‘oku nau fiema’u.
Na’a ne pehe koe founga ‘eni ke ta’ota’ofi ai ‘a e mafola holo ‘a e mahaki fakatu’utamaki ko’eni.
‘Oku toe fakatu’utamaki ange foki ‘i he ngaahi ‘aho ni lolotonga ‘a e ‘alotamaki ‘uha ‘oku tō ‘i he fonua.
