'Amanaki fakanofo Palemia Fili 'o Tonga
Dr. 'Aisake Valu Eke
21 Sanuali 2025. Kuo ma'u 'e he ongoongo ni ha fakamatala falala'anga 'oku 'amanaki fakanofo 'a e Palemia Fili 'o Tonga ki he lakanga Palemia 'e he 'Ene 'Afio 'a pongipongi 'aho 22 'o Sanuali 2025.
Na'e talu foki hono fili 'o Dr. 'Aisake Valu Eke ki he lakanga Palemia 'o e fonua 'e he Fale Alea 'o Tonga 'i he 'aho 24 'o Tisema 2024 pea koe meimei lava 'eni 'a e mahina 'e taha mei ai ko e toki 'amanaki 'eni ke fakanofo faka 'ofisiale.
Na'e me'a atu foki 'a e Palemia Fili ki 'Aokalani Nu'usila 'i he ngaahi uike si'i kuo maliu atu ko e fakataufolofola ki he Tama Tu'i ka na'e 'ikai foki ke fakahoko hano fakanofo 'o 'ona 'o tau toloi mai ai pe mo e feliuliuaki 'a e ngaahi fakamatala ki he fonua 'o a'u mai ki he 'aho ni koe fakamatala fakamuimui taha 'eni kuo a'utaki mai ki he ongoongo ni.
'Oku toe fehu'ia foki 'e he kakai 'o e fonua 'a e halafononga 'oku nga'unu atu kiai 'a e fonua he ngaahi 'aho ni 'i he tafa'aki ki he mafai pule tukukehe ange 'a e 'amanaki 'a e tokolahi 'e vave 'a hono fakanofo 'o e Palemia Fili 'o fakatatau ki he ngaahi fakamatala 'a kinautolu na'a nau tataki 'a e Fili Fakahaloto ke tukuhifo 'a e Palemia Maloloo 'o e fonua Hu'akavameiliku.
