Polokalama Ako Ngaue ma'ae hakotupu e fonua
17 Ma'asi 2024. ‘I he fengaue’aki fakataha ‘a e MTED - Labour Tonga mo e International Labour Organization (ILO) – Pacific Island Countries, pehe ki he Tonga Chamber of Commerce & Industry Inc. (TCCI) mo e Ahopanilolo Technical Institute (ATI), na’e fatu e polokalama ni ke fakafaingamalie’i ange e ma’u ngaue ‘a e to’utupu ‘aki hono fakanaunau ‘aki e poto’i ngaue totonu ‘oku fiema’u ‘e he ngaahi kautaha pisinisi.
Makatu’unga ‘eni ‘i he ngaahi savea mo e talatalanoa ki mu’a mo e ngaahi kupu ngaue fekau’aki, ‘o haa ai ‘a e ngaahi sekitoa ‘oku ‘ikai ke fenapasi lelei mo hohoa tatau ‘a e poto’i ngaue mo e taukei ‘oku fiema’u ‘e he ngaahi kautaha pisinisi, pea mo e ‘ilo mo e taukei faka-ngaue ‘oku ma’u ‘e kinautolu ‘oku kumi ngaue.
‘Oku hoko ai ke lahi ‘a e ‘ikai ma’u ngaue, pea faingata’a mo e kumi ha kau ngaue fe’unga ki ha ngaahi lakanga.
Ko e polokalama ako pea mo ngaue ko eni, ‘oku fuofua ‘ahi’ahi ‘i he sekitoa takimamata, pea ‘i he tafa’aki ‘o e ngaohi me’atokoni (cookery). Ko e ngaahi kautaha pisinisi ‘e 10 ‘i he tafa’aki pisinisi hotele mo e falekai te nau kau ki he polokalama ni.
Ko e fanau ako ‘e toko 21 mei he polokalama Hospitality (Cook) ‘a e ATI te nau ako pea mo ako ngaue, ‘o kamata mei he ‘aho 25 ‘o Ma’asi ni ki Novema 2024.
‘I he faka’osinga leva ‘o e to’u ako 2024 ‘e ma’u ‘e he tokotaha ako ‘ene setifikeiti ako Cert 4 kuo ‘osi ‘i loto ai ‘a ‘ene lava’i ‘a e polokalama ako pea mo ako ngaue ‘i he tafa’aki ‘o e cookery.
Ko hono ‘ahi’ahi’i ko eni ‘o e polokalama, ‘oku fakapa’anga ‘e he Pule’anga ‘a e peseti ‘e 60% ‘o e vahenga ‘o e kau ako ngaue pea 40% leva mei he ngaahi kautaha pisinisi.
‘I he me’a ‘a e Minisita ‘o e Potungaue, Dr. Viliami Uasike Latu, na’a ne pehe ‘oku ‘i ai e faka’amu ke ola lelei ‘a e polokalama ni hono fuofua fakahoko, pea ke lava ke fakalahi atu ke kau ki ai mo e ngaahi sekitoa ngaue fakatekinikale kehe ‘o ‘ikai ko e takimamata pe.
