Hoko atu Faka'ali'ali Ngoue mo e Ngaahi Ngaue 'a e Kakai 'i he ta'u ni
9 Fepueli, 2023. 'Oku 'amanaki ke toe fakahoko 'a e Maa'imoa Faka'ali'ali Ngoue, Toutai, Takimamata mo e Ngaahi Ngaue 'a e kakai 'i he 'otu Tonga ni 'i he mahina ko Sune mo Siulai hili ia ha'ane malolo 'ikai toe fakahoko 'i ha ta'u 'e 3.
Na'e makatu'unga foki 'a e 'ikai toe fakahoko 'a e katoanga faka-ta'u ko'eni mei he fakataputapui Covid-19 pehe foki ki he fakatamaki na'e hoko ki he fonua 'i he puna 'a e Mo'ungaafi Hunga Tonga Hunga Ha'apai.
Kuo fakaha faka'ofisiale mei he 'Eiki Minisita ki he Potungaue Ngoue mo e Toutai Lord Fohe kuo finangalo 'a e Tama Tu'i ke fakahoko 'a e katoanga ni 'i he ta'u ni pea 'e kamata 'i Tongatapu 'i he 'aho 3 'o Sune, 'Eua 'i he 'aho 10, Ha'apai 'i he 'aho 13 Siulai pea Vava'u ki he 'aho 20 'o Siulai pea ta tuku 'a e ongo Niua ki he 'aho 26 ki he 27 'o Siulai.
Na'e fakaha foki 'e he 'Eiki Minisita ki he Fefakatau'aki mo e Langa Fakalakalaka Faka'ikonomika pea toe Minisita Le'ole'o ki he Takimamata Hon. Dr. Viliami Uasike Latu koe faingamalie lelei 'eni ke faka'ali'ali ai 'a e ngaahi ngaue 'a e kakai mo e kau pisinisi pehe ki he Takimamata pea tanumaki ha 'atakai 'oku lelei ki he langa fakalakalaka faka-'Ikonomika 'a e fonua.
Ko e taha foki 'eni he ngaahi katoanga lalahi taha 'i he fonua pea 'oku 'amanaki lelei kiai 'a e kakai 'o e fonua.
