'Amanaki faka’ilonga’i kakato ta’u 'e taha Fakatamaki Hunga Tonga-Hunga Ha’apai
10 Sanuali, 2023. ‘Oku ‘amanaki ke faka’ilonga’i ‘i he ‘aho Sāpate 15 ‘o Sanuali, 2023 ‘a e Ta’u ‘e Taha ‘a e mapuna ‘a Hunga Tonga-Hunga Ha’apai (HTHH) ‘a ia na’e hoko ‘i he ‘aho Tokonaki 15 ‘o Sanuali, 2022 ‘aki ha ngaahi ouau lotu.
Na’e fakatupu ‘e he fakatamakí ni ha peaukula na’e fe’unga ‘a hono ma’olunga pea mo e mita ‘e 15 ‘a ia na’á ne uesia ai ‘a e ngaahi matāfanga ‘o Tongatapu, ‘Eua pea mo Ha’apaí pea na’e mole ai ‘a e mo’ui ‘e fā.
Ko e peseti ‘e 84 ‘a e tokolahi ‘o e kakai ‘i Tongá ni na’e uesia ‘e he peaukulá pea mo e ‘uha efú. Na’e fakafuofua ki he mahu’inga Pa’anga ‘Amelika ‘e $90.4 miliona ‘a e ngaahi maumau na’e fakatupu ‘e he fakatamakí ni pehē ki he ngaahi uesia tamaki mei he fe’unu’aki ‘a e kakai ‘i he ngaahi koló makatu’unga mei he maumau ‘a honau ngaahi nofo’angá mei he peaukulá.
Kuo tu’utu’uni ai ‘e he Pule’anga Tongá ke fakahoko ‘i he ‘aho Sapate ‘o e uiké ni, Sanuali 15 ha lotu fakafonua ke fakamanatua ‘a e ngaahi mo’ui na’e molé pea mo hūfia ‘a e kakai ‘o e fonuá ne hao mo’ui mei he fakatamakí ni.
‘E fakahoko fatongia atu ‘a e Potungāue ki he Ngaahi Ngāue Fakalotofonuá (MIA) ‘o fakafou ‘i he Tesi ‘a e Kau Taki Lotú ke fakahoko ki he ngaahi siasi kotoa ‘i Tongá ni ke fakakau ‘i he ‘enau ngaahi ouau lotú ‘a e kaveinga mahu’ingá ni.
