Fakafuofua ki he vakapuná ‘e 4 ‘e tu’uta ‘i he ‘aho 28 ki he 30 'Epeleli Featured
7 ‘Epeleli, 2021. ‘Oku fakafuofua ki he vakapuná ‘e 4 ‘e tu’uta ‘i he ‘aho 28 – 30 ‘o e mahina ni,‘i he polokalama fakafokifoki mai ko ia hotau kakai na’e tukuvakā ‘i muli talu mei he tāpuni hotau kau’āfonua ‘i Ma’asi ‘o e ta’u kuo’osi. Ko e ngaahi vakapuna mei Nu’usila, Brisbane pea mo Pangopango, Ha’amoa ‘Amelika pea mo Fisi.
Ko hono fakahā ‘eni ‘i he Fakataha’anga Fakafonua ki he Ngaahi Me’a Fakatu’upakē (NEMC) pea mo e Kōmiti ki hono Tokangaekina ‘o e Covid-19 ‘i he pongipongi ‘o e ‘aho ni. Ko e vakapuna mei Nu’usila mo Brisbane ko e vaka angamaheni pē ia ‘i he polokalama ko ‘eni.
Fakatatau ki he Pule Lahi ‘a e Potungāue MEIDECC Paula Pouvalu Ma’u, ko e vaka ko ia mei Pangopangó ‘e ha’u ai mo e kau Tonga mei Pangopango, pea ‘e fakafoki foki ai mo e kau pāsese ‘oku fakafuofua ki he toko 20 mei Tonga ni ki Pangopango.
Na’e fakahā foki ‘e Paula, ko e hokohoko ‘o e ha’u ‘o e ngaahi vakapuná ‘oku faka’aho ‘e 28. ‘A ia ‘oku palani ke hili ‘a e vakapuna ‘i he ‘aho 28 ‘o e mahina ni, pea vakapuná hoko ‘i Mē ‘aho 26 pea mo Sune ‘aho 23.
“‘Oku makatu’unga pē ‘eni ke ‘oange ha taimi fe’unga ‘i he hili ‘a e ‘aho ‘e 21 ‘o e kolonitiní, ki he kau ngāue laine mu’á ke nau malōlō ai pea mo fakamā’opo’opo ‘o e ngaahi feitu’u ki he fakamavahe’i makehe (quarantine facilities).”
‘Oku ‘i ai foki mo e vakapuna mei ‘Aositelēlia ‘e tū’uta ‘i he ‘aho ni, ‘o ‘ave ‘a e kau toli fua’i ’akaú. ‘Oku ‘ikai ke ha’u ‘a e vaka ko ‘ení mo ha kau pāsese.
