“Fanongonongo Fakapule’anga – Fakafonua ki he Hilifaki Kalauni” ^Featured

Koe ’uhí ko e mahu’inga fakafonua, fakahisitolia pea mo e tukufakaholo ‘o e katoanga Hilifaki Kalauni ‘o ‘Ena ‘Afifioa, Kingi Tupou VI mo Kuini Nanasipau’u ‘i he ‘aho 4 Siulai, 2015, ‘oku ‘oatu ai heni ha fanongonongo ki he kakai ke tokoni ki he teuteu ‘o e Hilifaki Kalauni.
 ‘Imisi ‘o ‘Ena ‘Afifio

‘Oku ‘oatu heni ha kole fekau’aki mo hano ngaue’aki ‘o ha ‘imisi ta pe ‘ata ‘o ‘Ena ‘Afifio ‘i he ngaahi papa faka’ali’ali, fale, mo e matapa, ke ‘uluaki ma’u ha ngofua tohi mei he ‘Ofisi ‘o e Lord Chamberlain, ‘i he ‘Ofisi Palasi.

Fuka Fakatu’i mo e Logo

‘Oku tatau pe mo e Fuka Fakatu’i mo e Logo ‘oku fakangatangata pe ia ki hono ngāue’aki ‘e he ‘Ene ‘Afio pe. Ko e Fuka Fakatu’i ‘oku ne fakahā mai ‘oku ‘afio he feitu’u koia ‘a ‘Ene ‘Afio, pea kau ki ai mo hono nofo’anga Fakatu’i mo e Palasi pe. Koia ai ko e ngaahi fakatau atu fakakomesiale, mo hono tufaki ki he kakai ‘o e ngaahi Fuka Fakatu’i, lolotonga ‘a e katoanga Hiliaki Kalauni, ‘oku ‘ikai ke ngofua.

 Anga Fakafonua mo e Tukufakaholo

‘I he tauhi hotau anga fakafonua mo e ngaahi me’a tukufakaholo, ‘oku fakaafe’i atu ai e kakai kotoa pe ke teuteu lelei mo e ta’ovala ‘i he ngaahi feitu’u mo e ngaahi ouau kotoa pe, kae tautefito ki he feitu’u Nuku’alofa.

Langa e Ngaahi Matapa

Kuo ma’u ‘e he Pule’anga ha ngaahi faka’eke’eke fie’ilo ki hono fokotu’u ha ngaahi matapa ‘i he komiuniti mo e ngaahi kolo, kā koe ’uhí ke malu’i ‘a e kakai mei ha ala hoko ha fakatu’utamaki mei he ‘uhila mo e ngaahi naunau pehē ki he ngaahi kaunga’api, koia ai ko e fokotu’u ‘o e ngaahi matapa ‘e fakangatangata pe ia ki he feitu’u Nuku’alofa pe, ‘a ia ‘e fakahoko ai ‘a e ngaahi ouau ‘o e Hilifaki Kalauni.

 Ki ha ngaahi faka’eke’eke ki he tu’unga mo e malu ‘o e ngaahi langamatapa, kataki ‘o fetu’utaki ki he ‘Ofisi Palemia.

Fakama’a ‘o Tonga

‘Oku fakamalo atu e Pule’angá ki he kakai kotoa pe ki he ngaue lahi kuo lava ‘i hono fakama’a ‘o e tafa’aki hala tahi, pea tautefito ki he Kolomu’a mo e vahenga kotoa pe ‘i Tonga ni.

 Fehu’aki ki he Ngaahi Feitu’u ‘o e Ngaahi Ouau

Ko e malu mo e kau lelei ki he kotoa ‘o e kau fakaafe mo e kau ‘a’ahi ‘e fakamu’omu’a ia lolotonga ‘a e katoanga. ‘Oku lahi e ngaahi hala mo e hū’anga ki he ngaahi ouau Hilifaki Kalauni ‘e ala tapuni fakataimi ki he kakai, ka ‘e toki fakanongonongo atu pe mei he Potungāue Polisi.
 
NGATA’ANGA

Tuku atu mei he:‘Ofisi ‘o e Palemia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644     Fax:  (676) 23 888; Ngaahi Faka’eke’eke- Email: This email address is being protected from spambots. You need JavaScript enabled to view it.