‘Aho Ako Fakaangaanga: Tokateu ki ha tō mai ‘a e KOVITI-19 ‘i he ‘aho Monite 8 ‘o Novema 2021 ^Featured

Ko e ‘aho 8 ‘o Novemá ko e ‘aho mālōlō faka-Puleʻanga pea ‘oku lelei ‘aupito eni he ko e fakatātā mahino eni ‘o ha tāpuni kakato ‘e hoko pea ‘e nofo ai ‘i ‘api ‘a e mātuʻá mo e kau tauhi fānaú ‘o tokoniʻi ‘a e ako ‘a e fānaú.

Ko e ako fakaangaanga ko ‘ení, ‘e kau atu ki ai ‘a e fānau ako ‘i he Ako Tokamuʻá, Ako Kau-Kātoá, Kalasi 1 ki he 6 ‘i he ngaahi Lautohi Siʻí mo e Akoteú pea mo e Kalasi 7 & 8 (Foomu 1 & 2) ‘i he ngaahi Ako Lotolotó mo e Kolisí ‘o tatau pe ‘i he ngaahi ako ‘a e puleʻangá pea mo e ngaahi ako ‘ikai faka-puleʻangá ‘a ia ‘oku nau ‘i Tongatapu, ‘Eua, Haʻapai, Vavaʻu, Niuatoputapu pea mo Niuafoʻou.

Ko e tokotaha ako kotoa pē ‘i he ngaahi lēvolo ko ‘ení ‘e ‘oatu ki ai ‘a e ngaahi naunau ako kuo ‘osi paaki atu ai ‘a e ngaahi lēsoni ‘e fakahokó pea mo e taimi ‘e fakamafola atu ai ‘a e ngaahi lēsoni ko ‘ení mei he Televīsone Tongá pea mo e Lētiō Tongá (A3Z).

‘E malava ke maʻu atu ‘a e ngaahi lēsoní mo e ngaahi vitiō faiakó mei he peesi ‘initaneti ‘a e Potungāué ‘a ia ’oku ‘iloa ko e Hama e-Learning Platform (HeLP): https://tonga.inclusivlearningplatform.com.

‘E lava pe ‘e ha taha ke ngāueʻaki ‘a e ‘initanetí pe peletifoomú (platform) lolotonga ‘a e ‘aho ako fakaangaanga ko ‘ení. ‘I he ‘osi ‘a e polokalama fakaangaanga ko ‘ení, ‘oku kole atu ki he ngaahi mātuʻa mo e kau tauhi fānaú ke fakafonu ‘a e foomu savea ‘e ‘oatú pea ‘e hounga ‘aupito ‘o kapau ‘e foki mai ‘a hoʻo kiʻi tamasiʻí pe taʻahiné mo e foomu savea kuo ‘osi fakafonú ‘o ‘ave ki he ‘ene faiakó ‘i he ‘aho hono hokó hili ‘a e polokalama fakaangaangá.

‘E fuʻu tokoni lahi ‘aupito ‘a hoʻo talí mo e fakamatala ‘e ‘omaí ke fakamahino mai ‘a e ngaahi meʻa mahuʻinga ‘e fiema’u ke fakaleleiʻi ‘aki ‘a e founga ‘a hono fakahoko pea mo e tuʻunga lelei ‘o e ngaahi naunau ‘oku teuteu maʻae fānau akó.

Ko e Tonga Accelerated and Resilience Program (TARP) ‘oku malava ia ‘i ha tokoni fakapaʻanga ki he Potungāue Ako mo e Ako Ngāué mei he Global Partnership for Education (GPE) ‘o fakafou mai mo fengāueʻaki mo e Save the Children Australia moe DFAT.

Ko e tefitoʻi taumuʻa ‘o e polokalamá ni ke fakasiʻisiʻi ‘a e uesia tamaki ‘e he KOVITI-19 pe ko ha fakatamaki fakaenatula ‘a e sisitemi akó ‘aki ‘a hono fakamalohiʻi ‘a e tokanga ki he ako feʻaveʻaki ngāueʻaki ‘a e tekinolosiá.

Ko e ngaahi fakamatala kotoa pe fekauʻaki mo e ako fakaangaanga ko ‘ení ‘e ‘oatu ia ki he ngaahi ‘apiakó; pea ‘e toki fakahoko atu mei ai ‘a e fakaikiiki. ‘Oku houngaʻia ‘aupito ‘a e Potungaué ‘i he ngaahi tokoni, poupou mo hoʻo mou kau mai ki he ‘aho ako fakaangaanga ko ‘ení.