Ko e ta‘anga hiva/himi pō le‘o ^Featured

Ko e fakafatu/fakafa‘u & fakaafo/fakafasi ‘ehe punake ta‘e‘iloa

Hiva/Himi 231

Kupu/Veesi 1

Kuo toki ngata

‘A e ta‘u ‘e taha

‘O ‘etau mo‘ui

Pea ‘oku ofi

‘A ‘itāniti

Kupu/Veesi 2

Ke tau toe fai

Hotau fononga

Mo e ta‘ufo‘ou ni

‘I he fingangalo

‘O hotau ‘Otua

Kupu/Veesi 3

‘Ofa ke tau pehē

‘I he ha‘ēle mai

‘A hotau ‘Eiki

Kuo u fai ‘o ‘osi

‘A ho‘o ngāue

Kupu/Veesi 4

‘Ofa ke tau ma‘u

‘I hotau ‘Eiki

‘A e lea pehē

Mālō kuo lelei

‘A ho‘o ngāue

 Kupu/Veesi 5

Ke ke ha‘u ki heni

Pea nofo mai

Ki hoku taloni

Ko e monū‘ia

‘I he‘eku Tamai

Koe ki‘i kinikini, huluhulu, moe fakamatala nounou

‘Oku ngāue‘āki lahi ‘ehe ngaahi Siasi ‘o Tonga Tau‘atāina, Siasi ‘o Tonga, moe Siasi Konisitūtone Tau‘atāina ‘o Tonga ‘ae hiva/himi 231he ouau lotu ‘oe malanga pō le‘o ‘oku tefito he ‘alu ‘ae ta‘u motu‘a kae ha‘u ‘ae ta‘u fo‘ou.

‘Oku mālie fau ‘ae lea koe pō le‘o he ‘uhinga koe ‘ā (kae ‘ikai mohe) ‘o le‘o mo lotu koe fakafeta‘i moe fakamālō kihe ‘Otua Hono ngeia moe mafimafi he ‘Ene ‘ofa moe koloa masani ‘oe mo‘ui he ‘alu ‘ae ta‘u motu‘a (pē ta‘u kuo ‘alu) kae ha‘u ‘ae ta‘u fo‘ou (pē ta‘u kuo ha‘u), māvae moe ta‘u motu‘a (pē māvae ta‘u) kae fe‘iloaki moe ta‘u fo‘ou (pē fe‘iloaki ta‘u), moe faka‘osi moe ta‘u motu‘a (pē faka‘osi ta‘u) kae kamata moe ta‘u fo‘ou (pē kamata ta‘u).

‘Oku hoko ‘ae liliu mo fetongi he ‘alu moe ha‘u, māvae moe fe‘iloaki, moe faka‘osi moe kamata ‘ae ta‘u motu‘a moe ta‘u fo‘ou koe ngaahi hoa tu‘uma‘u he vaeua ‘kemo’ (pē ‘sekoni’), ‘o malava noa ke hū ‘ae mate moe faingata‘a, ‘aia ‘oku mā‘uhinga lahi ai ke ‘ā mo le‘o mo Sihova he funga ‘oe hake ‘ae lotu moe tautapa ki Langi ‘i ‘olunga na kae hifo ‘ae tapuaki moe ‘alo‘ofa ki Mamani ‘i lalo ni.

‘Oku taku na‘e fakafatu/fakafa‘u mo fakaafo/fakafasi ‘ae ta‘anga hiva/himi pō le‘o mohu fau ni ‘ehe taha ‘oe kau Taula‘eiki Faifekau punake talā ‘oe ongo motu‘a Siasi Tonga, ‘o ‘ikai ngata pē he tatau, potupotutatau, mo mālie hono heliaki kae toe māfana, vela, mo fakalaumālie hono fasi.

‘Oku mālie lahi hono tufunga ‘ehe punake ‘ae ta‘anga koe fieta (theatre) he fakaofi ‘etau fononga ‘oku fai meihe kauvai ‘oe mo‘ui ‘i taimi kihe kauvai ‘oe mate ki ‘itāniti he ta‘u motu‘a (kupu/veesi 1, kohi/laini 1-5), ‘o toe pehē hotau fatongia he fononga he ta‘u fo‘ou he‘etau fakafeangai moe ‘Otua (kupu/veesi 2, kohi/laini 1-5); ‘oku pehē tofu ‘etau tali kihe ‘Eiki he‘etau faimateaki mo faikikitaki

‘Ene ngaahi ngāue moe fekau (kupu/veesi 3, kohi/laini 1-5); pea ‘ikai koia pē ka tau toe tali, ‘Eiki kuo ‘osi mo lava lelei ho‘o ngāue moe fekau na‘a ke tuku mai ko hoku fatongia totonu ke fai ko Ho‘o ‘ofa mo‘oni moe tapuaki lahi (kupu/veesi 4, kohi/laini 1-5); pea tali mai ‘ae ‘Eiki keke ha‘u ā koho pale ‘o nofo he to‘omata‘u ‘ae taloni ‘oe Tamai (kupu/veesi 5, kohi/veesi 1-5).

Tau toki hoko atu.

‘Ofa lahi moe hūfaki,

Fetongikava Dr Viliami Uasikē Lātū &

Hūfanga-He-Ako-Moe-Lotu Palōfesa Dr ‘Ōkusitino Māhina