Fakahalafononga ‘o e Kuonga Fo‘ou ma‘a e Tonga ^Featured

Fakahalafononga ‘o e Kuonga Fo‘ou ma‘a e Tonga - Ko e ta‘anga viki Fakafatu/fakafa‘u ‘e Sione Tu‘itahi

Kupu/veesi 1

Tonga koe kihi‘i tāputa

Kae fonu he tapuaki faka-‘Otua

Fakamonū hota koloa mei ‘olunga

Kae ‘ilo e ‘akau lelei hono fua

 Kupu/veesi 2

Fatongia ē kuo poletaki

Tau kau he pue mo mamani lahi

Siu-mei-moana mama‘o si‘ono kakai

Kae moana honau loto ‘amuange e ‘atamai

Kupu/veesi 3

 ‘Oua ‘e lau kafo kae lau lava

Si‘i-pē-kae-hā he faivaola

Tufakanga tatau ‘a tangata mo fafine

Li‘oa ma‘a mamani, kaimu‘a ‘a ha‘a tufunga

 Kupu/veesi 4

He kuo liuanga ‘a mamani ‘o fonua pe taha

Taha ‘a hota matakali, fa‘ahinga ‘oe tangata

Fetaiaki e lotu, poto, mo e fonua

Fakahalafononga fo‘ou ma‘a hota kuonga

 Kupu/veesi 5

Kolo-e-‘ofa tatau atu kae liu e folau

Kihe Maka-ko-Fele‘unga moe Vai-ko-Kanakana

Ki si‘i Fa‘onelua moe Vao Nukonuka

Tupu‘anga si‘ete ‘ofa mateaki he fonuaola

Koe fakamatala, kinikini, moe huluhulu nounou

 Na‘e unu mo to‘o ‘ae ta‘anga viki mālie ni mei he taha ‘oe ngaahi tohi mā‘uhinga mo ‘aonga lahi ‘a Sione Tu‘itahi (Tu‘ulātala) koe “Tōkanga ko e Mo‘ui‘anga: Ngaahi Taukei ‘a Kiteau Tatafu ko e Ngoue Vavetaha ma‘a e Tonga” (2016) ‘Oku fokotu‘utu‘u ‘ae ta‘anga viki ni kihe kupu/veesi 4, kohi/laini 4, ‘aia ‘oku ngāue‘aki lelei ‘ehe pulotu fa‘u ‘ae fa‘ahinga lalahi ‘e tolu ‘oe heliaki, ‘o ‘uhinga kihe ‘lea kih me‘a ‘e taha kae ‘uhinga kiha me‘a ‘e taha,’ ‘aia koe heliaki fakafetongiaki, heliaki fakafekauaki, moe heliaki fakafefonuaki.

‘Oku kamata ‘ae ta‘anga ‘i Tonga koe fonua si‘i mo vaivai, ‘ene masiva he kakai mo masiva he mahafu, ‘o hangē koe lea ‘oe ta ‘anga loloto ‘ae punake kakato ko Fakatava (Melekiola) ka ‘oku mohu he ngaahi lelei, ‘aia ka ngāue‘aki mo‘oni koe koto tapuaki lahi (kupu/veesi 1, kohi/laini1-4). ‘Oku hoko atu kihe pole ma‘ae Tonga he‘ene vaa‘ivaka he kolope ‘oku taku koe fo‘ipiliote mo ‘hotau tahi ‘otumotu’ he lau ‘a Palōfesa Epelei Hau‘ofa ‘o humaki he hoa ‘ae ‘atamai moe loto koe mālohinga ha kakai (kupu/veesi 2, kohi/laini 1-4).

‘Oku hoko atu kihe mamafa ‘oe fatongia moe ngafa, ‘o ‘ikai lau ‘ae faingata‘a ka koe ikuna, neongo ‘ene si‘i moe lahi kae muka ‘ae lelei, ‘o ma‘unga ‘a tangata ki tōkanga mo manga moe fakahokohoko hingoa koe ‘ulumotu‘a kae fafine ‘a falehanga mo hanga moe fakahokohoko toto koe feilaulau faima‘u koe fahu ma‘ae fonua mo mamani fua (kupu/veesi 3, kohi/laini 1-4). Kuo hoko ‘ae matalahi ‘a mamani koe matefua ‘ae ngaahi matakali moe ‘ātakai, ‘aia koe fetu‘u hengihengi fo‘ou hotau kuonga ni (kupu/veesi 4, kohi/lainin 1-4).

‘Oku tatau mai ‘ae pulotu kae liuvaka kihe tupu‘anga koe lata‘anga kihe Ha‘ano Si‘i Kae Fakalahi Kihe Ako moe Lotu moe Lapaha moe Fu‘u Fā‘onelua ‘oku kei fisi mo matala moe Hunga he Pulepulekai koe Matapā ki Palataisi moe ‘Īteni ‘oe ‘Otu Kaveinga, ‘o vakai ‘ae fanga kui he kuolili ‘i mu‘a koe tūhulu, moe kaka‘u ‘i mui ‘oku fai hono huluhulu ‘oku fakafenāpasi ta‘etuku mo ta‘engata ‘ae kuohili kuo hoko moe kaha‘u ka hoko, fakatoulōua he fihitu‘u ‘ae lotolotonga ‘oku hoko (kupu/veesi 5, kohi/laini 1-4).

 Tau toki hoko atu ...

 ‘Ofa ma‘u moe ānau fau,

 Fetongikava Dr Viliami Uasikē Lātū &

Hūfanga-He-Ako-Moe-Lotu Palōfesa Dr ‘Ōkusitino Māhina