To e Ongona ‘a e Le‘o ‘o e Tukipitu ‘i Tonga Hili ha Ta‘u ‘e 238 ‘ene Mole Featured
Hema Ki Mata'u; Hoa-mo-Faleono Fulivai Kaivelata, 'Uluaki Maka Kaivelata, Palōfesa Hufanga Dr. 'Okusitino Mahina, Halaevalu Mangisi Palu, Tu'ifonualava Kaivelatau
Nuku'alofa, 2 'OKatopa, 2015. Na‘e to e ongona ‘a e le‘o fungani ‘o e tukipitu ‘i Tonga hili ha ta‘u ‘e 238 ‘ene mole mei Tonga he konifelenisi ‘a e Va‘a ‘a e Pasifiki ‘o e Kautaha ‘Aati ‘a e Pasifiki (Pacific Arts Association Pacific Chapter) ‘oku lotolotonga fakahoko he Senitā Fakataha‘anga Fā‘onelua (Fā‘onelua Convention Centre) ‘i Nuku‘alofa, Tongtapu, Tonga mei he ‘aho Tūsite 29 ‘o Sepitema ki he ‘aho Sāpate 4 ‘o ‘Okatopa, 2015.
Na‘e fakahoko ‘a e ngaahi faiva ni ‘e he kau tāme‘a Fangufangu Mīnoa ‘O Tonga (Minor Nose-Flute Of Tonga) Musical, ‘a ia na‘e ngāue‘aki ‘a e fo‘i hiva ‘e 3, ‘o ongo fakafa‘ahikehe pē afo mīnoa pē afo maina kotoa. Na‘e kamata‘aki hono hiva‘i ‘a e “Kolulu Ē” fakataha mo e faiva tāfangufangu, faiva tukipitu mo e faiva tālali, pea hoko hono hiva‘i ‘a e “‘Ana Lātū” fakataha mo e faiva tāfangufangu, faiva tākitā mo e faiva tā‘ukulele mo faka‘osi‘aki hono hiva‘i ‘a e fo’i sipa ‘o e faiva ta'anga hiva lakalaka ‘a e Fola‘osi mei Kanokupolu.
Na‘e tefito ‘a e pepa ‘a Tu‘ifonualava mo Palōfesa Hūfanga he‘ena poloseki hono fakaake mo fakakake ‘a e tufunga ngaohifangufangu mo e faiva tāfangufangu, ‘a ia ‘oku ofi ke mole fakatoulōua. Neongo hono lotolotonga fakahoko ‘a e poloseki fangufangu ka na‘e to e fakakaukau ‘a Tu‘ifonualava mo Palōfesa Hūfanga ke fai ha ngāue vave mo lahi hono to e fakakake mo fakaake ‘a e tufunga ngaohitukipitu mo e faiva tukipitu, ‘a ia kuo loa ‘ena fakatou mole lōua.
‘Oku lau na‘e ngāue‘aki ‘a e me‘alea tu‘ufonua fakaTonga ko ‘eni ko e tukipitu he ngaahi faiva tupu‘a fakaTonga ko e me‘etu‘upaki, ‘otuhaka mo e fa‘ahiula, ‘o kau ai ‘a e me‘elaufola mo e he‘a, ‘a ia kuo na to e mole fakatoulōua. Na‘e kau ‘a e ngaahi me‘alea hangē koe fangufangu, mimiha mo e tukipiu he ngaahi me‘alea na‘e ‘ave ‘e he kau kaivai muli, ‘a ia ‘oku ke i tokanga‘i, tauhi mo malu‘i he ngaahi misiume he ngaahi fonua muli. ‘Oku ua pē ‘a e ongo me‘alea tukipitu ‘oku ke i toe mo tolonga, ‘a ia ko e taha he misiume he ‘Univēsiti Pekeni ‘i Noaue mo e misiume ‘i Tapulini ‘i ‘Aileni.
