Kau ‘a e Fangufangu he Konifelenisi ‘a e Kautaha ‘Aati ‘a e Pasifiki ^Featured

‘E lau he konifelenisi ni ‘a e pepa ‘a Tu‘ifonualava Kaivelata mo Palōfesa Hūfanga Dr ‘Ōkusitino Māhina he fangufangu, ‘a ia ko e taha ia ‘o e ngaahi me‘alea tupu‘a ‘a Tonga. ‘Oku ngaohi ‘a e fangufangu mei he kofe, ‘o fekau‘aki mo e ‘aati ‘e ua, ‘a ia ko e tufunga ngaohifangufangu mo e faiva tāfangufangu pē faiva ififangufangu.

‘Oku ui ‘a e pepa ‘a Tu‘ifonualava mo Palōfesa Hūfanga ko e: “Afo fangufangu, fasi fakatangi, ongo fakafa‘ahikehe: The lost Tongan minor tone,” ‘o tefito hono fetongi ‘a e afo mīnoa pē maina tupu‘a fakaTonga ‘e he afo mīsoa pē maisoa fakaUēsite, ‘a ia na‘e fua fakahū mai ‘e he kau misinale. ‘Oku tefito foki ‘a e me‘alea fangufangu he afo mīnoa pē maina.

‘Oku ‘iloa ‘a e afo mīnoa pē maina fakaTonga ko e ongo fakafa‘ahikehe (pē ongo fakatētēvolo), ‘o hangē ko ‘ene ‘asi he fasi fakatangi ‘o e ngaahi fananga mo e ngaahi afo tupu‘a ‘o e faiva me‘etu‘upaki, ‘otuhaka mo e fa‘ahiula, ‘a ia kuo to e liliu māmālie ki he afo mīsoa pē maisoa.

Na‘e kau ‘a e tufunga ngaohifangufangu mo e faiva tāfangufangu he poloseki na‘e taki ‘e Palōfesa Hūfanga mo Tu‘ifonualava, ‘a ia na‘e tokoni‘i fakapa‘anga ‘e he Creative New Zealand, ‘o tefito hono to e fakaake mo fakakake ‘a e tufunga mo e faiva ni kuo ‘a‘alu ke mole.

Na‘e faiako foki ‘a Palōfesa Hūfanga he ngaahi ‘aati mo e ‘ikonōmika fakapolitikale ‘a e Pasifiki he ngaahi ‘univēsiti ‘I muli mo Tonga mo to e fatu ta‘anga ka e faiako ‘a Tu ‘ifonualava he tufunga langafale mo e tufunga fakasanisani he ngaahi ‘apiako haisikulu mo to e faiva tāme‘alea foki.

‘E fakaava‘aki mo tapuni‘aki ‘a e pepa ‘a e faiva tāfangufangu, pea mo fakatātā‘aki hono fakataha‘i ‘a e ngaahi me‘alea fakaTonga, ‘o hangē ko e faiva tāfangufangu, faiva tukipitu, faiva tukifala, faiva tālali, mo e ngaahi me‘alea fakaUēsite, ‘a ia ‘e ngāue‘aki ‘a e faiva me‘etu‘upki ko e “Ko Lulu Ē,” faiva hiva tengihia ko e “‘Ana Lātū” mo e sipa mei he faiva lakalaka ‘a e Fola‘osi mei Kanokupolu.