Lava Lelei ‘a e Polokalama Lea he Faiva, Tufunga mo e Nimamea'a, Uike Lea Tonga 2015, ‘Aokalani, ‘Aotealoa Featured
L - R: Taani Lavulavu, Kolokesa U. Māhina-Tuai, Professor Hūfanga Dr 'Ōkusitino Māhina, Kenneth Tuai, Benjamin Work & Akesiumeimoana Tuai.
'Aokalani, 18 Sepitema 2015. Na‘e lava lelei ‘a e Polokalama Lea ma‘ae komiunitī Tonga ‘i ‘Aokalani ‘Aotealoa Nu‘usila he ‘aho 5 ‘o Sepitema 2015 he faka‘osinga ‘a e Uike Lea Tonga 2015 mei he folau ‘a e kau ‘ātisi mo e kau ‘akatēmika Tonga, ‘a ia na‘a nau ‘a‘ahi mo fekumi ai he ngaahi misiume ‘iloa ‘i Pilitania mo ‘Iulope.
Na‘e fakahoko ‘a e Polokalama Lea ni he Langimālie Garden Hall he Jordan Avenue ‘i ‘Onehunga, pea na‘e fakatefua ai ha tokolahi ‘o e kāinga Tonga mo e kāinga muli, ‘o tefito ki he kau taki he komiunitī, kau toulekeleka, kau ‘ātisi, kau ‘akatēmika mo e to‘utupu.
Na‘e hulu‘i foki ai ‘e he kau lea takitaha ‘a e ngaahi ‘ata faka‘ofo‘ofa, mā‘uhinga mo hāhāmolofia ‘o e koloa tukufakaholo tupu‘a ‘a Tonga, ‘o tefito ki he ngaahi ‘īmisi felave‘i mo e faiva, tufunga mo e nimamea‘a, ‘a ia ko e vahetolu lalahi ia ‘o e ‘aati fakaTonga.
Na‘e ‘ave foki ‘e he kau kaivai tālā ka e tautefito ki a Kapiteni Kuki ‘o Pilitānia mo Kapiteni Malasipina ‘o Sipeini ‘a e ngaahi koloa tukufakaholo ni he senituli 18, pea hokohoko atu ‘e he kau misinale, ‘a ia ‘oku lotolotonga tauhi, tokanga‘i mo malu‘i he ngaahi misiume lahi ‘i Pilitānia mo ‘Iulope.
Na‘e fai ‘a e lotu kamata ‘e Faifekau ‘Isikeli Lātū ko e Pule ‘o e Vahefonua Tongatapu, mo fai ‘a e lotu tuku ‘e Faifekau Nōmani ‘Aho ko e Pule ‘o e Vahefonua ‘Aotealoa Nu‘usila, fakatoulōua ‘a e Siasi Konisitūtone Tau‘atāina ‘o Tonga.
Na‘e fakaava‘aki ‘a e Polokalama Lea ‘a e faiva tā[ifi]fangufangu ‘a Tu‘ifonualava Kaivelata ko e faiako, pea tapuni‘aki ‘a e faiva tā[ifi]fangufangu, faiva tālali mo e faiva tukipitu ‘a Taniela Kaivelata, Viliami Kaivelata mo Siosiua Kaivelata ko e kau mēmipa ‘a e Fangufangu Mīnoa ‘o Tonga.
Na’e fai ‘a e lea talitali mo fakaafe‘iloaki ‘e Palōfesa Hūfanga Dr ‘Ōkusitino Māhina ko e sea mo fai ‘e Taani Lavulavu ‘a e lea tuku mo fakamālō ko e sekelitali ‘a e Talasiti Ako, ‘Aati mo e Fakalakalaka Fonua-Moe-Tala-‘O-Tonga.
Na‘e hoko atu leva ki he ngaahi lea ‘a Benjamin Work [Tu‘i Matoto-Tu‘i Vava‘u], Kenneth Tuai, Tui Emma Gillies mo Kolokesa Māhina-Tuai mo Palōfesa Hūfanga pea faka‘osi ‘e Fetongikava Dr Viliami Uasikē Lātū ko e Minisitā Malōlō ‘a e Potungāue Komeesi, Takimamata mo e Leipa ‘a Tonga hono fakahū ‘a e fonua mo e tala ‘o Tonga he liviu ‘o e Lao Takimamata he 2012.
