Me'a'ofa Fangufangu, Ipukava Mo e Tohi Ki he Misiume ‘O e ‘Akiolosī Mo e ‘Ātolopolosī He ‘Univēsiti Kemipilisi ‘I Pilitānia Featured
Mei hema ki mata‘u, ‘otumu‘a - Meleseini Haitelenisia Fifita ‘O Lakepa Lolohea Tuai & Akesiumeimoana Tu‘ulaikemipilisi Tupou Tuai, ‘otumui - Kolokesa Māhina-Tuai, Dr Rachael Hand mei he Misiume & Palōfesa Hūfanga Dr ‘Ōkusitino Māhina ‘i mu‘a he matapā hū‘anga ki he Misiume he ‘Univēsiti Kemipilisi.
1 'Aokosi, 2015. Na‘e foaki ‘a e me‘a‘ofa ko e fangufangu, ipukava mo e tohi ki he Misiume ‘o e ‘Akiolosī mo e ‘Ātolopolosī [Museum of Archaeology and Anthropology] he ‘Univēsiti Kemipilisi [Cambridge University] ‘i Pilitānia Lahi, ‘o tānaki ki he ngaahi koloa tupu‘a / tu‘ufonua fakaTonga lahi ‘oku lotolotonga tokanga‘i, tauhi mo fakatolonga he Misiume.
‘Oku meimei ko e lahi taha ‘a e koloa ni ko e ma‘u mei he kaivai ‘iloa ko Kapiteni Kuki he‘ene ngaahi folau ‘e tolu ki Tonga he faka‘osinga ‘o e senituli 17 mo e lotolotonga ‘o e senituli 18, ‘a ia ‘oku kau ai ‘a e kato mosikaka, kato alu, helu, pōvai, tao mo e ngaahi me‘a lahi kehe. ‘Oku hala ‘a e Misiume ‘i Kemipilisi he fangufangu mo e ipukava, ‘o kau ia he ‘uhinga lahi na‘e foaki ai ‘a e fo‘i fangufangu mo e ongo ipukava.
Na‘e foaki ‘a e ngaahi me‘a‘ofa ni lotolotonga ‘a e ‘a‘ahi mo e fekumi ‘a Palōfesa Hūfanga Dr ‘Ōkusitino Māhina mo Kolokesa Māhina-Tuai mo e kau ‘ātisi Tonga ko Benjamin Work, Tui Emma Gillies mo Sulieti Fieme‘a Burrows ‘i Sune mo Siulai 2015 he ngaahi ngāue fakatufunga mo fakanimamea‘a tu‘ufonua fakaTonga he ngaahi Misiume ‘i ‘Iulope mo Pilitānia Lahi.
Na‘e tufunga ‘a e fo‘i fangufangu na‘e foaki ‘e Tu‘ifonualava Kaivelata mo hono teuteu ‘e Sēmisi Fetokai Potauaine. Na‘e kau ‘a e fo‘i fangufangu he ngaahi fo‘i fangufangu ‘e 16 na‘e ngaohi he fua ako tufunga ngaohifangufangu ‘enau poloseki hono to e fakaake ‘a e tufunga ngaohifangufangu na‘e fakapa‘anga ‘e he Creative NZ he 2015, ‘o hoko atu ki he konga II ko e faiva tā/ififangufangu he 2016.
‘Oku lahi ‘a e ngaahi fangufangu he ngaahi Misiume kehe ‘i Pilitānia, ‘Iulope mo ‘Aotealoa Nu‘usila, ‘a ia ko e lahi taha mei Vava‘u, ‘o mahino ai na‘e longomo‘ui ‘a e tufunga ngaohifangufangu mo e faiva tā/ififangufangu ‘i Tonga kotoa. ‘Oku ‘i ai ‘a e fo’i fangufangu he Misiume ‘o Pilitānia [British Museum], ‘a ia ‘oku teuteu‘aki kotoa ‘a e ngaahi kupesi kehekehe hono tumohoka‘aki ‘a e afi, ‘o ngalingali ko e fo‘i fangufangu Tonga lahi taha ia, ‘a ia ‘oku fute ‘e 2 mo e ‘inisi ‘e 6 hono loloa pea ‘inisi ‘e 2 tupu hono fuolahi/taiamita.
Na‘e kau mo e ongo ipukava ‘e ua, ‘a ia ko e ipukava ‘uli mo e ipukava tea, fakataha mo e fo‘i fangufangu, he me‘a‘ofa, ‘o kau fakataha mo e ngaahi koloa fakaTonga ‘i ai, ‘a ia ‘e fai hono tokanga‘i, tauhi mo fakatolonga ke tu‘uloa mo tuputupu‘a he Misiume. ‘Oku fakaloloma fau he ‘oku ‘ikai ma‘u ‘a e hingoa ‘o e tufunga ngaohi/vauipu na‘a ne ngaohi/vau ‘a e ongo ipukava ka ko e me‘a fakafiefia pē ko ‘ene kau he koloa ‘e tu‘uloa mo lauikuonga he Misiume ‘e ma‘unga ki ai ‘a e hakotupu ‘o e fonua ha‘anau fekumi he kaha‘u.
Na‘e to e foaki foki ma‘ae laipeli ‘a e Misiume mo e tohi ko e “Hinavakamea mo Tunavakamea ko e Tufunga Tongiukamea: Fakafelavai ‘a e Fakahoko mo e Fakamavahe / Hinavakamea and Tunavakamea as Material Art of Steel-Cutting: Intersection of Connection and Separation” he‘ene ongo tufunga tongiukamea he matapā hū‘anga ki he Uafu ko Vuna ‘i Nuku‘alofa, ‘a Sēmisi Fetokai Potauaine.
Na‘e ma‘u foki ‘e Sēmisi ‘a e pale ‘aati ongoongoa he fe‘auhi lahi ‘a e Kominiueli [Commonwealth Connections International Arts Residencies] he 2009, ‘o fakahoko ai ‘ene ngaahi ngāue faka‘aati lalahi he Misiume ‘i Kemipilisi he 2010, ‘a ia na‘e fokotu‘utu‘u honau faka‘ali‘ali, ‘o kau fakataha mo hono fa‘u ‘o e tohi he‘ene ngaahi ‘aati, ‘e Palōfesa Hūfanga, Dr Jocelyne Dudding mei he Misiume mo Kolokesa.
