Ola lelei 'aati uekasopu 'a e kau 'atisi 'o Ha'apai Featured
Ko e ni'ihi 'o e kau 'aati uekasopu. 'Otu mu'a, mei hema ki mata'u, fika 2 kihe fika 5: Tevita Pola'apau, Uili Lousi, Sapate ASfeaki-Toke, Hufanga Prof. Dr 'Okusitino Mahina.
24 Sune, 2018. Na'e lava lelei 'a e uekasopu 'ahotolu 'o e poloseki 'aati 'a e Tonga Skills-Uili Lousi Art Studio he 'aati 'o e tufunga mo e nimamea'a 'a e kau 'atisi 'o Ha'apai he 'aho Tusite 19 ki he Tu'apuleulu 21 'o Sune, 2018. Na'e fokotu'utu'u mo fakahoko 'a e uekasopu 'e he Tonga Skills mo e Uili Lousi Art Studio mo fakapa'anga 'e he Pule'anga 'Aositelelia.
Na'e fe'unga mo e uike 'e fitu hono fakahoko 'a e uekasopu 'a ia na'e kamata 'i Tongatapu mo hoko atu ki 'Eua, Vava'u mo faka'osi 'i Ha'apai. Na'e taumu'a 'a e uekasopu ke to e hiki 'a e tu'unga 'o e 'aati 'a Tonga ki he tukunga fakavaha'apule'anga hono ngaohi mo maketi fakatouloua ko e ngaue faka'aati.
Na'e taki he feako'aki 'aati uekasopu 'a Ha'apai 'e he 'atisi fakavaha'apule'anga ko Uili Lousi 'o e Uili Lousi Art Studio mo Tevita Pola'apau ko e 'atisi lahi mo faiako 'aati 'iloa he ngaahi ta'u lahi pea mo e sikola, punake mo e 'aati (mo e litileli) teolisi mo e kilitiki ko Hufanga Hufanga Prof. Dr 'Okusitino Mahina 'o e Tonga International Academy.
Na'e kau he uekasopu 'aati hono faka'ali'ali 'a e ngaue faka'aati 'a e kau 'atisi 'o Ha'apai, 'a ia na'e faka)anga'i 'e he kau taki 'o e uekasopu 'aati. Na'e makatu'unga 'eni he malohinga mo e vaivainga 'a e ngaahi 'aati, 'o taumu'a ko e langa hake 'a e tu'unga hono fakakaukau mo ngaohi 'a e 'aati ki he tu'unga fakavaha'apule'anga.
Na'e fakamamafa he tu'unga fakavaha'apule'anga ko 'eni 'a e ma'uhinga ke fo'ou mo makehe (originality), mohu'atamai (creativity) mo fakapoto (innovation) hono fakakaukau mo ngaohi 'a e 'aati. 'Oku 'uhinga heni ki he makehe ma'u pe hono fakakaukau mo ngaohi mei he tatau ka e ke i tatau, potupotutatau mo faka'ofo'ofa.
Na'e kau ai 'a e 'aati malie lahi 'a Tevita Pola'apau lotolotonga 'a e uekasopu na'a ne ngaohi mei he hungaluopea (veve 'o tahi), 'o hange ko e papa, 'akau, limu, nge'esi-fingota, feo, 'one'one moe ha fua. Na'e fo'ou mo makehe 'ene filihi mo fokihi hono fuo mo e uho 'ene 'aati he'ene lisaikolo 'a e ngaahi matiliolo ko e veve 'o tahi, 'a ia 'e lava taku ko e 'eco-art.'
Na'e fai foki 'a e 'aati uekasopu 'o e 'aati poloseki 'a e Tonga Skills mo e Uili Lousi Art Studio he lotolotonga 'o e ngaahi katoaga lahi he 'Otu Ha'apai 'oku 'iloa ko e Tu'i Ha'apai mo e Ha'apai Masani Festival 2018.
'Oku kau ai 'a e Fili Misi Talavou/Hoihoifua, Faka'ali'ali Ngoue Fakatu'i, Konifelenisi 'a e Siasi Uesiliana Tau'ataina 'o Tonga mo e 'Aho 'Alo'i 'o Tupou VI ko e Tu'i 'o e 'Otu Tonga. '
