Lava lelei uekasopu moe poloseki Nimamea'a 'a Vava'u Lahi Featured
Ko e kau 'atisi tufunga mo e nimamea'a he uekasopu. 'Oku ha he 'otu mu'a, mei hema ki mata'u, 'a Dr Uhila-moe-Langi Fasi (fika 4), Talekita 'a e Tonga Skills, Uili Lousi (fika 5), 'atisi mo e Talekita 'a e Uili Lousi Art Studio mo Veuveuso 'Ealelei (fika 6), 'atisi mo e tokoni faiako.
18 Sune, 2018. Na'e lava lelei hono fai 'a e uekaspou 'o e poloseki 'aati tufunga mo e nimamea'a 'a e Tonga Skills mo e Uili Lousi Art Studio 'oku tokoni'i 'e he AusAid 'i Vava'ulahi mo e Lolo'ahalaevalu he 'aho Tusite 12 ki he 'aho Tu'apulelulu 14 'o Sune, 2014, hili hono fua fai 'i Tonga'eiki/Tongatapu/Tongalahi mo hoko ki he Fungafonua 'i 'Eua he faka'osinga 'o Me mo e kamata'anga 'o Sune.
'Oku taki 'a Uili Lousi mo Hufanga Palofesa Dr 'Okusitino Mahina hono fai 'a e poloseki 'aati, mo toki tokoni fakataimi ki ai ha kau 'atisi 'ilonga Nu'usila mo Tonga, 'o hange ko Kosipeli Talia, Benjamin Work, Veuveuso 'Ealelei mo Tevita Pola'apau, 'a ia 'oku tefito 'enau nngaahi 'aati he ngaahi mitiume kehekehe, 'o kau ai 'a e tufunga tavalivali, tufunga tatongitongi mo e tufunga fonolei.
'Oku taumu'a tefito 'a e poloseki 'aati ke hiki 'a e tu'unga tolonga mo faka'ofo'ofa 'o e tufunga mo e nimamea'a mo e tukunga honau 'aonga mo e fakamaketi ki he levolo fakamamanilahi. 'Oku 'iai 'a e tui ko e lahi ange 'enau faka'ofo'ofa ange ko e lahi ange ia 'enau 'aonga fakapa'anga, 'o 'uhinga 'a e lahi ange 'enau 'aonga fakapa'anga ko e lahi ange 'enau faka'ofo'ofa.
Na'e fakaholomamata 'a e ngaahi ngaue faka'aati tufunga mo e nimamea'a 'a e kau 'atisi tangata mo fafine 'e tokotahavalu na'a nau lesisita mo kau he ngaahi usekasopu, 'a ia na'e faka'ali'ali kinautolu ko e konga lahi 'o e ako. 'Oku kaunga lelei 'enau tu'unga faka'ofo'ofa honau fiema'ua mo manakoa ki he kau folau'eva, 'o tu'ukimu'a ai 'a Vava'ulahi he faka'ofo'ofa fakanatula.
'Oku lave ki ai 'a e ta'anga malie 'a e punake 'ilo ko ia ko Feke Tutu'ila, 'o fakatatau 'a Vava'ulahi hono faka'ofo'ofa ko e Matapa 'ia o Palataisi, 'a ia 'oku tu'u ai 'a e ngoue mohu mo fonu 'o 'Iteni. 'Oku ne pehe na'e 'osi teuteu pe 'e Natula 'a Vava'ulahi mo fakateunga, 'a Vava'ulahi talu mei mu'a, 'o tala 'e he kau mesianiti 'oku laka hake ia mo mahiki he kotoa 'o e 'Otumotu Pasifiki.
Na'e faka'osi'aki 'a e uekasopu 'aati 'aho tolu ma'uhinga ni ha katoanga ma'u setifiketi fiefia 'a e kau 'atisi na'a nau kau he ako 'aati, 'a ia na'e foaki 'e he Talekita 'o e Tonga Skills ko Dr 'Uhila-moe-Langi Fasi mo tokoni ki ai 'a Uili Lousi 'o e Uili Lousi Art Studio.
'E hoko atu mo faka'osi 'a e poloseki 'aati kihe 'Otu Ha'apai mo e Fanga'ihesi he 'aho Tusite 19 ki he 'aho Tu'apulelulu 21.
