Lava Lelei 'a e Ako 'Aati 'a e Kau 'Atisi Tufunga mo e Nimamea'a 'a 'Eua Featured
Kau 'atisi tufunga moe nimamea'a 'a 'Eua he'enau ako 'aati tufunga moe nimamea'a 'aho tolu. 'Oku ha he 'otu mu'a, mei hema ki mata'u, fika 1, 2 mo e 3, 'a Sisifa Fili (Pule Fakavahe), Uili Lousi (Uili Lousi Art Studio), Palofesa Dr Hufanga ('Okusitino Mahina, Uili Lousi Art Studio, TIA & VACIAR).
9 Sune, 2018. Na'e lava lelei 'a e ako 'aati 'a e kau 'atisi tufunga mo e nimamea'a 'a 'Eua na'e fokotu'utu'u mo fakahoko 'e he Tonga Skills mo e Uili Lousi Art Studio 'i Fungafonua he 'aho Tusite 5 ki he 'aho Falaite 8 'o Sune, 2018 ta'u.
Na'e hoko atu 'a e ako ni ki 'Eua hili 'a e lava lelei hono fakaava mo kamata mo e kau 'atisi tufunga mo e nimamea'a 'a Tonga'eiki / Tongatapu / Tongalahi mei he 'aho Tusite 29 'o Me ki he 'aho Tokonaki 2 'o Sune.
Na'e kau 'a e ongo 'atisi 'iloa Nu'usila mo Tonga ko Kosipeli Talia mo Benjamin Work, 'o tokoni ki he 'atisi lahi ko Uili Lousi mo e punake mo e 'aati (mo e litileli) teolisi mo kilitiki ko Palofesa Dr Hufanga ('Okusitino Mahina).
Na'e hoko atu 'a Uili Lousi mo Palofesa Dr Hufanga ki Fungafonua, 'o tefito 'a e ako hono hiki 'a e founga mo e tu'unga ke fakamamanilahi hono fakamaketi 'enau ngaue faka'aati honau tufunga mo ngaohi mo fa'u.
Na'a na lave lahi ki he 'uhinga 'a e 'aati ko e feinga ma'u pe 'a e 'atisi ke kehe 'ene ngaue mei he tatau he funga 'o e fo'ou (originality) mo e 'atamai'ia (creativity) mo e fakapoto (innovation) ko e halanga ki he fakamamanilahi.
Na'a na to e lave ki he tu'unga fakahisitolia malie 'o 'Eua ko ia mo 'Ata 'a e motu'a fonua ka e toki fusi hake 'e he Kau Maui 'a e toenga 'o Tonga fakataha mo Fisi mo Ha'amoa mo e toenga mei moana he'enau taumata'u.
'Oku mahino mei he talaefonua mohu mo fonu 'o 'Eua ko e motu'a senita 'o e sivilaise ia ha ngaahi senituli lahi, 'o tefito he ngoue, fakamanu mo e toutai, mo kau ai mo e ngaahi faiva tupu'a ko e faiva sika mo e faiva fanifo.
Palofesa Dr Hufanga ('Okusitino Mahina) lotolotonga 'ena kilkitiki mo Uili Lousi, 'o tefito he malohinga mo e vaivainga, 'a e ngaahi 'aati 'a e kau 'atisi na'e faka'ali'ali ko e konga 'o e ako.
Na'e tolonga mai 'a e fua senita ko 'eni 'o e sivilaise ki he kuonga 'o Tafakula, 'a ia na'a ne hoko ai 'a e ngaahi alea fakapolitikale lalahi, 'o kau ai mo e 'ilo mo poto tu'ufonua, 'a ia 'oku heliaki he kaiha'a fonua mo e afi.
Na'e ke i tu'uloa mai 'a 'Eua ko e senita lahi 'o e sivilaie ki he kuonga 'o Lo'au ko e tufunga fonua 'iloa, 'o tefito 'i 'Eua Lahi mo 'Eua Si'i ('Eueiki), 'a ia na'a ne tufunga ai 'ae Tala 'o e Kava mo e To fakataha mo e Vahefonua 'a Lo'au.
'E hoko atu 'a e ako 'aati ki Tokelau Ofi ki Vavalahi he uike 3 pea toki faka'osi ki he Ha'apaiveu he uike faka'osi 'o Sune, 'o tefito pe he 'uhinga tatau ko e feinga ke hiki ke fakamamanilahi hono ngaohi mo maketi 'a e 'aati.
