Faka'ali'ali 'Aati Feinga Pa'anga Ma'ae 'Apiako 'Aati Seleka Featured
Ko e ni'ihi 'a e ngaahi 'aati ne foaki me'a'ofa.
11 Ma'asi, 2018. Na'e lava lelei hono fakaava 'a e faka'ali'ali 'aati ko e "Shine On Seleka" (SOS, "Save Our Souls") pe "Huhulu ('Ae Maama) 'I Seleka" 'o fakahangahanga mo fakataumu'a ko e feinga pa'anga ke tokoni hono to e langa fo'ou 'o e Apiako 'Aati Seleka (AAS) pe Seleka School of Art (SSA) 'a ia na'e veteki mo veuki 'e he saikolone ko Leiti Gita.
Na'e fai 'a e faka'ali'ali 'aati ma'uhinga ni he efiafi Tu'apulelulu 'aho 8 'o Ma'asi, 2018, he fale sitiutio tatatau 'o e tufunga tatatau 'iloa ko ia ko Terry Koloamatangi 'i Onehunga, i 'Aokalani, 'i Aotearoa Nu'usila.
'Oku fokotu'utu'u mo fakahoko 'a e faka'ali'ali 'aati faka'ofo'ofa mo 'aonga lahi ni 'e he kau 'atisi tu'ukimu'a mo faimatekina 'a e Moana 'Osenia Pasifiki 'o taki ai 'a Benjamin Work, Dagmar Dyck, Filipe Tohi (Sopolemalama), Terry Koloamatangi, Loa Toetu'u, Rimoni Dyck, Paul Janman (tufunga hele'uhila 'o e filimi "Tongan Ark" ["'A'ake Tonga]") mo e tokolahi kehe pe.
Kuo foaki 'e he kotoa 'o e kau 'atisi 'enau ngaahi 'aati kehekehe 'o hange ko e tufunga tavalivali, tufunga fonolei, tufunga tamaka mo e tufunga tatongiotongi mo e ha fua ko e me'a'ofa ke tokoni ki he ngaue lahi 'oku fai hono talaki mo pao-mo-toloaki ni 'a ia 'e fakatautuki kotoa 'i 'Epeleli hili ha mahina 'e taha mei heni 'o foaki kotoa 'a e pa'anga 'e ma'u ki he 'Apiako 'Aati Seleka.
'Oku to e poupou ki he langangaue ni 'a e kau sikola moe 'akatemika 'o hange ko Dr 'Ieti Lima, Dr Scott Hamilton (tufunga fa'utohi 'oe tohi "The Stolen Island: Searching for 'Ata" [Koe Motu Kaiha'asi: Fekumi ki 'Ata"), Hufanga Professor Dr 'Okusitino Mahina, Robert Soakai, mo Kolokesa Uafa Mahina-Tuai mo e kau faifekau 'o hange ko Viliami Ha'ota 'I Pangai Sau (Keiano Pa'utu 'O Vava'ulahi) mo e tokolahi kehe pe.
Na'e fokotu'u foki 'a e 'Apiako 'Aati Seleka mo talekita ai 'a e sikola mo e 'atisi 'iloa 'i Tonga mo hotau potutahi mo mamanilahi foki ko Tevita Ma'ameivai Latu 'o taumu'a ko e 'apiako 'aati ma'ae kakai ke ako'i mo fakatolonga ai 'a e 'aati ko e to'onga mo'ui makehe ka e tefito ki he hakotupu 'o e fonua 'oku nau fonuhia mo mohu'atamaia he taleniti ka e 'ikai fai poupoua mo mahinoa 'e he ako mo e fonua.
'Oku fengaue'aki vaofi 'a e AAS (pe SSA), mo e Tonga International Academy (TIA), pe 'Akatemi Fakavaha'apule'anga 'O Tonga (AFT), 'o ako'i 'a e ngaahi koosi 'aati 'a e TIA he AAS 'e Tevita mo e kau faiako 'a ia 'oku lau mo kuletiti kihe TIA moe AAS fakatouloua. Na'e foaki foki ha ngaahi faka'iloga Setifikei he Faini 'Aati ki he tokoono (6) 'a e AAS he katoanga hilifaki mata'itohi hono 4 'a e TIA.
