‘Amanaki hifoaki fuofua ‘Alapama Lomipeau Aotearoa Featured
Kulupu Pukepuke 'o Tonga
5 'Epeleli, 2017. ‘Oku ‘amanaki ke hifoaki (launch) ‘a e fuofua ‘alapama ‘a e kau hiva ‘oku ‘iloa koe Lomipeau ‘o ‘Aotearoa ‘i he ‘aho Tokonaki ko hono 8 ‘o ‘Epeleli ni ‘i he Mangere Arts Center ki Mangere ‘i ‘Aokalani.
Ko e kau hiva foki ko’eni ko e konga pe foki ia ‘o e Kautaha Pukepuke ‘o Tonga pea ‘oku nau fakatolonga mai ‘a e ngaahi maa’imoa ‘a Kuini Sālote Tupou III pehe ki he ngaahi faiva faka-Tonga.
Na’e fakamahino foki ‘e Dr. Sione Vaka mei he Pukepuke ‘o Tonga ‘oku mahu’inga foki ki he kulupu ni ke pukpuke ‘a fufula mo pātoloaki ‘a e mahu’inga ‘o e ngaahi maa’imoa ‘a e Ta’ahine Kuini ‘o makatu’unga hono mahu’inga faka'aati mo tukufakaholo.
Ko e fuofua taimi foki ‘eni ke lekooti fakapolofesinale ai ‘a e ngaahi maa’imoa ‘a e Ta’ahine Kuini Queen Sālote Tupou III mo hono fakafasi mo fakahaka ‘e Vili Pusiaki ‘o Lapaha.
Ko e kulupu foki ko’eni ‘oku tokolahi taha koe fanga mokopuna ‘o Vili Pusiaki pehe kia Tuila Pusiaki ko e ongo punake ‘a e Lomipeau mei Lapaha.
Ko e konga foki ‘o e ngaahi ma’a’imoa lakalaka ‘a e Ta’ahine na'e faiva'i 'e he Lomipeau na’e fakafasi pea fakahaka ‘e Vili Pusiaki ‘o Lapaha 'a ia ko hono faanga mokopuna 'eni 'oku 'a nautolu 'a e Pukepuke 'o Tonga.
‘Oku amanaki foki ke fakaafe fakalangilangi ‘i he polokalama hifoaki ‘o e ‘alapama ni ‘a e Ta'ahine Pilinisesi Mele Siu’ilikutapu Kalaniuvalu Fotofili pea 'oku fakaafe'i kiai 'a e tokolahi.
1 comment
-
Malo mu'a e ngaue lahi 'a e Pukepuke 'o Tonga mo e Lomipeau 'o 'Aoteroa hono ke i pukepuke-'a-fufula 'o e taufatungamotu'a 'o Tonga pea 'oku 'ikai fai ha ofo ai he ko e hulihuli 'a e fu'u Toa kuo tahi 'o hange ko e lea talaa 'a e kupu 'o e maa'imoa ta'anga lakalaka malie 'a Kuini Salote ko e "Takafalu:"
Tuku atu e fonua mo e tala
Lauaki e Motu'apuaka
Ka te u faiva mo tukuhua
He tangata 'o e Kauhala'uta
'Oku taku 'i he talaefonua
'Oku fio he 'alofi tupu'a
'Oku to e malie mo e 'ata 'o e 'alapama he lau mo e fakatotolo 'a e kau sikola he faiva 'o makatu'unga fakapoto mo loloto 'a e vaa'ihaka 'o e haka 'a tangata he tikili 45/45 mo e vaa'ihaka 'o e haka 'a fafine he tikili 30/60.
'Oku to e 'asi lelei 'eni he vaa'ita moe vaa'ihaka ko e "FU E UA" ka e tefito he kamata 'a e faiva lakalaka 'o tikili 45/45 'a e haka 'a tangata ka e tikili 30/60 'a e haka 'a fafine. 'Oku 'ikai ngata pe he'ene fokotu'u mai 'a e vaa'ita tefito ka 'oku ne toe fokotu'u mai 'a e vaa'ihaka tefito.
'Oku to e malie hono li fua mai 'e he tangata faiva fika ua mei hema he kakai tangata hono va'e ki mu'a he 'oku 'i ai hono fatongia tefito ko e 'uluaki 'oku 'i ai 'ene vaa'ita (ko hono tauhi 'a e taimi, ta pe to 'o tokoni hono fakatonu 'o e hiva mo e haka) mo e ua 'oku 'i ai 'ene vaa'ihaka (ko 'ene ngaue ki mu'a mo ngaue ki mui 'o tokoni ki he fakatonu 'o e taimi, ta pe to 'a e hiva mo e haka). 'Oku to e pe 'eni ke malimali 'a e fofonga 'o e kau faiva 'o tatau pe 'a tangata mo fafine (he koe faiva ko e feifia mo e katakata ka e 'ikai ko e mamahi mo e tangi).
Neongo kotoa ia 'oku malo e ngaue faimateaki pea 'ofa ke mou ma'u ha 'aho katoanga hifoaki 'alapama fonu fiefia mo e 'ekelesia mo ha faiva malie 'o mohu he mafana, vela mo e tauelangi.