Faka'ali'ali 'Aati Lahi he MIT 'i Manukau, 'Aokalani, Aotearoa Nu'usila Featured
Mei hema ki mata'u - 'Otu mu'a: Noma 'Ofa-ki-Nu'usila Talakia'atu, Karen (Si'i) Pele, Kolokesa Māhina Tuai, Koleti Havea.
'Otu mui:
Benjamin Work, Mele Kulutuma Tafuna, Seini Fainga'a, Gus Gilmore (MIT Chief Executive), Dr Stuart Middleton (MIT Director, External Relations), Peter Quigg (MIT Director Academic Operations), 'Ana Fakaola Havealeta, 'Evelingi Havea, Talakihesina Filipe & Hūfanga Professor Dr 'Okusitino Mahina (Advisor, Art Projects). Faitaa/Photo by: Raymond Sagapolutele
26 Fepueli, 2017. Na'e fai 'a e faka'ali'ali 'aati lahi he Manukau Institute of Technology (MIT) 'i Manukau, 'Aokalani, Aotearoa Nu'usila he 'aho Falaite 24 'o Fepueli 2017. Na'e tefito 'ae faka'ali'ali he ongo ngaue faka'aati ko e "Ngatu Tupenu Ta'uli" (Black-marked Fabric Barkcloth) mo e "The Three Kete" (Kato 'e Tolu 'o e 'Ilo).
Na'e fakatefua mai ki he faleako fo'ou 'a e MIT Manukau Campus 'i Manukau 'a e kau pule mo e tokolahi 'o e kau ngaue 'a e 'apiako mo e kau pule mo e ni'ihi 'o e kau ngaue 'a e Misiume Fakamanatu 'o e Tau 'o 'Aokalani fakataha mo e kau ako mo e kau 'atisi mo e kau taki 'o e komiuniti mo e famili mo e maheni
Na'e fa'u 'a e "Ngatu Tupenu Ta'uli" ko e ngatu 'oku mita 16 hono loloa mo e "The Three Kete" koe tivaevae (monomono) 'o mita 12 hono loloa 'e he kau 'atisi Tonga mo Kuki 'Ailani 'o taki ai 'ae ongo 'atisi Tonga ko Benjamin Work moe Kuki 'Ailani konga Mauli ko Leilani Kake 'a ia na'a ta mo tisaini 'a e kupesi ka e toki tokoni 'a e kau 'atisi hono ngaohi.
'Oku lotolotonga tautau 'a e ongo 'aati "Ngatu Tupenu Ta'uli" mo e "The Three Kete" he loto faleako lahi 'o e MIT Manukau Campus 'i Manukau 'a ia na'a nu komisoni 'a Kolokesa U. Mahina-Tuai 'oku ngaue ko e Project Curator, Pacific 'a e Auckland War Memorial Museum 'i 'Aokalani, Aoteara Nu'usila ke ne fokotu'utu'u mo fakalele.
Na'a ne fili 'a Benjamin mo e kau 'atisi nimamea'a 'a e kulupu 'a fafine Tonga ko e Fauniteni 'o e Mo'ui 'a e Siasi Metotisi Tonga 'i Dominion, Mt Eden ke ngaohi 'a e ngatu mo Leilani mo e kau 'atisi nimamea'a 'a e kulupu 'a fafine Kuki 'Ailani ko e Pacific Mamas he Corban Estate 'i Henderson ke ngaohi 'a e tivaevae.
Na'e 'ikai ngata pe he'ene fo'ou 'a e fakakaukau, naunau mo e founga na'e fa'u'aki 'a e ongo 'aati ka na'e tupu mei mohu 'atamai hono fakakaukau'i mo e makehe 'a e naunau mo e founga na'e ngaohi'aki 'ene to e faka'ofo'ofa atu 'o ngaue'aki fakatouloua 'a e kupesi fo'ou mo e kupesi motu'a he founga fo'ou.
Na'e ngaue'aki 'e Benjamin 'a e ngaahi kupesi fo'ou mei he ngaahi kupesi 'oku tatongitongi he me'atau 'o hange ko e povai 'i loto he hala mo e vakatou he ongo tapa fakataha mo e vali kula (koka kula) mo e vali 'uli (tongo 'uli) ka e ngaue'aki 'e Leilani 'a e ngaahi kupesi motu'a he founga fo'ou 'o kau ai 'a e kupesi kefukefu.
