Siutaka e Manuesina 'i Moana 'o Tamafua he Taulanga Waitemata Featured
Manuesina 'i Waiheke he hangai mei 'uta kihe moana he Taulanga Waitemata
24 Sanuali, 2017. 'Oku nanafaki ke siutaka e Manuesina 'i Moana 'o tamafua he Taulanga Waitema he hangai ki Langitoto, 'Api ko 'Atalanga mo Va'epopua moe 'otu fanga.
'Oku fai mafana hono teuaki ke fakaava 'ae faka'ali'ali papiliki 'aati lahi he motu ko Waiheke he Waitemata 'i 'Aotearoa Nu'usila mei he 'aho Falaite 27 'o Sanuali kihe 'aho Falaite 17 'o Fepueli, 2017 'oe ta'u.
'Oku kau ai 'ae Manuesina 'aia koe tufunga tongiukamea moe sikalpusa na'e tufunga 'ehe 'atisi, 'akiteki moe 'akatemiki Tonga ko Semisi Fetokai Potauaine.
Na'e kau 'a Semisi he kau 'atisi 'e toko 34 na'e fili mei he kau 'atisi 'e toko 200 tupu ke nau kau he faka'ali'ali papiliki 'aati lahi ko 'eni, 'o nau fili tau'ataina ha'anau fakakaukau moe 'aati ke nau tufunga'i.
Na'e fili 'a Semisi kene tufunga 'ae Manuesina, 'o makatu'unga he kupesi fakaTonga, 'aia koe manulua koe 'ata-ki-loto ia 'oha ongo manupuna 'oku na puna fakataha koe 'ata-ki-tu'a 'oe kupesi manulua, 'o tefito he manuvakai moe manusiu.
'Oku 'asi 'eni he Manuesina, 'aia koe puna tu'ulu hifo mei 'olunga ki lalo 'ae manuvakai kae malanga hake 'ae manusiu mei lalo ki 'olunga, 'o mahino 'oku 'iai 'ae fili moe ika fekai, 'o nau hola mei he fakatu'utmaki 'o tahi moe moana kihe malu 'oe langi moe vava.
Na'e ma'u 'e Semisi 'ae ngaahi pale lalahi he 'aati na'e kau ai 'ae Commonwealth International Connections Arts Residency, 'aia na'a ne fakahoko he Cambridge University 'i Lonitoni, 'one tufunga ai 'ae ngaahi 'aati mohu mo faka'ofo'ofa fau.
Na'a ne toe tufunga moe ongo tufunga tongiukamea moe sikalapusa koe Hinavakamea moe Tunavakamea he hu'anga kihe Uafu ko Vuna, 'aia koe konga 'oe Polokalama Fakafonua Papiliki 'Aati Fakafonua (National Public Art Programme) na'e fokotu'u 'e Fetongikava Dr Viliami Uasike Latu lotolotonga 'ene Minisita Leipa, Takimamata moe Komeesi he Pule'anga motu'a.
Na'e fokotu'u 'e Fetongikava Dr Latu 'a Hufanga Palofesa 'Okusitino Mahina koe fale'i faka'aati 'oe Polokalama Fakafonua Fapiliki 'Aati Fakafonua, 'aia na'e kau ai 'a Hinavakamea mo Tunavakamea, 'o hange pe ko 'ene toe hoko koe fale'i 'oe ngaahi 'aati 'a Semisi he Cambridge University moe tufunga tongiukamea moe sikalapusa Manuesina.
