'Eke 'e he Uitou Fifita Holeva Tuku'aho 'ene totonu ki he Lisi 'Api ko Fatai ^Featured

Ko e hopo ‘eni ‘i he vaha’a ‘o e Tu’ipelehake ‘o e ‘aho ni mo e uitou pea ‘oku fekau’aki tonu ‘eni mo e ‘api ko Fatai ‘a ia ‘oku lolotonga lisi ‘e he Kautaha ‘Ea Nu’usila pea ‘oku ‘i loto ‘i he kelekele ko’eni ‘a e fale e’ 4.

‘Oku kaunga foki ‘a e Potungaue Fonua, Savea mo e Ngaahi Koloa Fakaenatula ki he hopo ko’eni ‘o makatu’unga ‘i he ngaahi lisi kuo fakahoko ki he ‘api ni. Fakatatau ki he fakamatala ‘a e loea ‘a e Tu’ipelehake William Clive Edwards koe ‘eke ko’eni ‘oku lahi hono ngaahi pole makatu’unga ‘i he tu’u ‘a Lao. Na’e fakaha ‘e Edwards ‘oku fu’u ‘ova ‘a e ‘eke ‘oku fakahoko ‘e he uitou ‘o fakatatau ki he Lao he kapau ‘oku tohi tuku ha koloa pea ‘oku fakamahu’inga ki he $10,000 pea mo e vahe tolu ‘o e pa’anga ‘oku toe ‘o kau kiai mo e ‘api kolo moe ‘api Tukuhau ‘i he founga ‘o e Lao lolotonga.

Na’e toe fakaha foki ‘e Edwards ko e tu’unga ki hono lesisita ‘o e ‘api ‘oku ki’i fihi mo ia ka koe me’a kotoa ‘e toki vete mei he Fakamaau’anga. Ko e uitou Fifita Holeva Tuku’aho ‘oku lolotonga laumalie lelei pe pea na’e ‘ikai foki ke ‘i ai ha’a na fanau moe Tama Tu’ipelehake kuo pekia. ‘Oku ‘ikai sola ‘a e ‘api tupu’a ni ki he fonua pea koe me’a’anga foki ia ‘o e Hou’eiki Lalahi ‘o e fonua talu mei tuai.

‘Oku te’eki ke mahino ha taimi ‘e faka’aho kiai ‘a e hopo ni ‘o fakatatau ki he fakamatala ‘a e Fakafofonga Lao William Clive Edwards.