Puke kau polisi faito'o konatapu kilo 'e 15 he faka'osinga 'o e uike
12 Fepueli 2024. Na'e puke 'e he kau polisi ha faito'o konatapu kalasi 'oku 'iloa ko e 'aisi (methamphetamine) lahi hake he kilo 'e 15 mei he taha 'o e ngaahi 'api nofo'anga 'i Kolofo'ou pehe ki he taha 'o e ngaahi 'ofisi lalahi 'i Nuku'alofa.
Na'e puke fakataha heni moha tangata ta'u 37 pehe ki hono tuofefine ta'u 39 'i he po'uli hifo 'o e 'aho Tokonaki 10 'o Fepueli.
Fakatatau ki he fakamatala mei he Potungaue Polisi ko e puke 'o e faito'o ni mo e tokoua ko'eni 'oku tukuaki'i kiate kinaua 'a e faito'o ni koe konga ia 'o e Operation Feke 'a e Potungaue Polisi pea ko e kilo 'e 5.73 na'e puke mei he 'api nofo'anga pea kilo leva 'e 9.927 na'e pule mei he 'ofisi 'oku ngaue ai 'a e matapule ko 'eni na'e puke.
Ko e kau foki 'eni he faito'o lahi kuo puke 'i he fonua ni pea 'oku kei hokohoko atu pe 'a e fakatotolo 'a e kau polisi ki he me'a ni.
Na'e ha foki 'a e tokoua ni 'i he Fakamaau'anga Polisi 'i he ho'ata 'o e 'aho ni pea 'oku muimui'i pe 'e he ongoongo ni 'a e tu'unga 'o e keisi ko'eni.
'Oku toe tapou pe foki 'a e Potungaue Polisi ki ha ni'ihi 'oku nau ma'u ha fakamatala fekau'aki mo e faito'o ni kenau fetu'utaki hake ki he Potungaue Polisi.
