Ta'efiemalie kau loea Tonga ki hono fokotu'u 'o Afeaki ke le'ole'o he lakanga Tu'i Fakamaau Lahi Featured
Kahungunu Barron-Afeaki
27 'Okatopa, 2021. Kuo fakahu atu 'e he ni'ihi 'o e kau loea 'a Tonga pea 'oku nau memipa 'i he Sosaieti Lao 'a Tonga 'a 'enau tohi tangi ki he Tama Tu'i 'i he Fakataha Tokoni 'o fakaha 'enau ta'efiemalie ki hono fokotu'u 'o Kahungunu Barron-Afeaki ke Le'ole'o 'i he Lakanga Tu'i Fakamaau Lahi 'a Tonga.
Ko e tohi tangi ko'eni na'e fakamo'oni kiai 'a e kau loea 'e toko 15 pea koe tokolahi 'o kinautolu koe kau loea 'iloa ia mo taukei taha 'i he fonua pea kuo ta'u lahi 'enau nagaue fakalao ma'ae fonua pea takimu'a mai ai 'a William Clive Edwards.
Ko e Tu'i Fakamaau Lahi Lolotonga ko e matapule 'Aositelelia ko Micheal Whitten pea 'oku lolotonga poaki livi mahina 'e 4 ka 'oku faka'ohovale hono fokotu'u 'o Afeaki ia kene le'ole'o he lakanga ma'olunga taha ko'eni 'i he Pule Tolu 'o e fonua lolotonga ia 'oku 'ikai koha Fakamaau 'a Afeaki pea 'oku fepaki 'eni ia mo e tukufakaholo 'a hono fili 'o ha Fakamaau ke le'ole'o 'i he lakanga ni.
'Oku tukuaki'i foki 'e he kau loea ko'eni 'a Lord Dalgety 'a ia koe memipa ia 'i he penolo 'oku nau fili 'a e kau Fakamaau ki he filifilimanako mo hono fa'ufa'u 'a e fo'i fokotu'u lakanga ko'eni.
Ko Afeaki foki koe kaungame'a ia 'o Lord Dalgety pea 'oku toe kau pe foki mo Afeaki 'i he kau Law Lords 'a e Fakataha Tokoni.
'Oku tui 'a e kau loea 'oku nau fakahoko 'a e tohi tangi ni ko Laki Niu 'a ia ko e taha ia 'o e kau Fakamaau Lahi 'a e fonua 'oku totonu kene le'ole'o 'i he lakanga ko'eni.
Ko Lord Afeaki 'oku kau 'i he kau memipa 'o e penolo 'oku nau fili 'a e kau Fakamaau pea 'oku ta'efiemalie lahi 'a e kau loea ko'eni ki he'ene hu masila hake mei he penolo 'o le'ole'o 'i he lakanga taupotu taha ko'eni 'i he Pule Tolu 'o e fonua ka 'oku 'ikai ha'a ne taukei kiai.
Ko Afeaki foki 'oku ngaue fakalao pe 'i Nu'usila ka 'oku 'ikai koha Fakamaau ia ai.
