Puke kau Polisi tangata ta’u 59 mo e faito’o konatapu mahu'inga 2 miliona Featured
Fale Talitali’anga teuteu ki he folau ‘a e Mala’e Vakapuna Fuaamotu (Departure Lounge)
10 Me, 2018. Na’e puke ‘e he kau Polisi ‘i he ‘aho Tusite ‘i he Fale Talitali’anga teuteu ki he folau ‘a e Mala’e Vakapuna Fuaamotu (Departure Lounge) ha tangata’eiki ‘o ma’u fakataha moia ‘a e faito’o konatapu koe methamphetamine pe koe 'aisi fe’unga mo e kilokalami ‘e 1.9.
Na'e toe ma’u fakataha foki mo ha pa’anga ‘Amelika laka hake he $5000-00 USD mei he tangata ko’eni.
Ko hono ma’u foki ‘eni ‘a e faito’o ni lolotonga ia ‘a e teuteu ke folau atu ‘a e tangata ni kii Nu’usila pea ‘oku mahino koe fakataumu’a ‘a e faito’o ni ki Nu’usila.
‘Oku fe’unga foki ‘a e mahu’inga ‘o e faito’o ko’eni mo e pa’anga ‘e 2 miliona ($2,000,000-00) (street value) kapau ‘e fakatau atu ‘i he hala ‘i Nu’usila.
Kuo ‘omai ai ‘a e tapou fefeka mei he Potungaue Polisi ki he kakai ‘o e fonua kenau tokoni ange ki hono fakasi’isi’ 'a hono fetuku holo mo hono fakatau ‘o e faito’o konatapu ni ‘i Tonga ni he ‘oku ne uesia lahi ‘a e ma’uma’uluta ‘a e sosaieti.
Kuo hokohoko mai 'eni 'a hono puke 'e he kau polisi 'a e kakai 'oku nau fetuku holo 'a e faito'o konatapu 'i he fonua pea 'oku fakamalo'ia heni 'a e ngaue lahi mo 'osikiavelenga 'a e Potungaue ni.
