Toloi e hopo koe hola 'a e Faka'iloa mei Vava'u Featured
4 'Epeleli, 2018. Kuo toloi 'e he Fakamaau Lahi Justice Gato 'a e hopo 'i he Fakamaau'anga Lahi 'i Vava'u 'aneafi 'aho 3 'o 'Epeleli 'a e matapule ko Mohi Halalupe mei Vaimalo ko 'ene hola 'a 'ana mei Vava'u ki Tongatapu lolotonga 'a e tali ko'eni ki he hopo.
Na'e toe tu'utu'uni ai pe 'e Justice Gato 'i he mahinoi kuo hola 'a e Faka'iloa ke kumi 'a Mohi Halalupe 'o fakafoki ki Neiafu he vave taha.
Na'e faka'ilo foki 'a Mohi ki he tikite 'e ua fekau'aki mo e alakovi 'i ha ta'ahine ta'u 18 'i he ta'u kuo 'osi pea na'e tukuange ki tu'a 'i hano kole ke tauhi ki tu'a 'o fakatatali ai ki he hopo 'a ia na'e 'amanaki kamata 'i he 'aho 'aneafi.
Ko hopo foki ko'eni na'e fokotu'utu'u ki he 'aho 'e tolu pea koe toloi ko'eni 'oku 'ikai mahino ha taimi ke fakahoko ai kae 'oua leva kuo ma'u 'a e Faka'iloa.
'Oku lolotonga 'i Vava'u foki 'a e Fakamaau Lahi ko Gato pehe ki he kau ngaue a e Fakamaau'anga Lahi 'i he konga 'o 'enau takai fakata'u ki he 'otu motu 'i Tokelau.
'Oku 'amanaki kenau 'i Vava'u 'i ha uike 'e ua.
