Fakafepaki’i ‘e he kau tō kava ‘a e fokotu’u ke pule’i ‘e he Va’a Pule Fakafuofua totongi ’o e kava Featured
26 Siulai, 2017. ‘Oku ‘i ai ‘a e hoha’a lahi ‘a e kau tō kava ki he feinga ko’eni ‘a e ni’ihi ke ‘ave ‘a e tototongi ‘o e kava ke pule’i ‘e he Va’a Pule Fakafuofua ‘a e Potungāue Leipa.
Kuo tā tu’o lahi ‘a e launga mo e feinga ‘a e ni’ihi ke holoki ‘a e totongi ‘o e kava ‘o pehe tokua ‘oku fu’u mamafa ka ‘oku fakafepaki’i lahi ‘eni ‘e he kau tō kava tautautefito ki he kau tō kava mei he Vahefonua Vava’u mo e Vahefonua ‘Eua.
‘I he fakamatala ‘a e tokotaha ‘o e kau tō kava mei he Vahefonua Vava’u ‘oku ne pehe ‘oku laulaunoa ‘a e feinga ko’eni he koe talu si‘enau fe’ao mai mo e ma’ulalo ‘a e totongi ‘o e kava pea ko ‘ene hiki ko’eni ke ma’u ai hanau faingamalie kuo feinga ‘a e ni’ihi ko’eni ke holoki ‘a e totongi makatu'unga he 'uhinga ngali siokita.
Na’e toe fakamahino pe foki ‘e he Pule Le’ole’o ‘o e Potungāue Leipa, ‘Anisi Bloomfied ‘i hano faka'eke'eke ia 'e he ongoongo 'a e Letiō Tonga oku fepaki ‘eni ia mo e lao ke pule’i e totongi ‘o e kava he ‘oku kau ‘a e kava ia ki he ngoue ‘oku tō pea koe ma’u’anga mo’ui ia ‘a e kakai ‘oe fonua.
‘Oku mahino ko hono ‘ohake ‘a e ngaahi fokotu’u ko’eni lolotonga ‘a e polokalama ‘a’ahi ‘a e Fale Alea ka ‘oku fakafepaki’i fefeka ‘eni ‘e he kau tō kava.
‘Oku fakaofi atu foki ‘a e totongi ‘o e kava ki he pa’anga ‘e $150 ki he kilo pea koe monū ‘eni ‘oku tofanga ai si’i kau to kava.
'I he fakamatala 'a e taha 'o e kau tō kava mei he Funga Fonua na'a ne pehe ai koe ngāue lahi 'oku fakahoko ki he kava pea 'oku tō pea tauhi 'i he ta'u 'e 3 pe pe lahi hake pea toe fakamole ki hono ta'aki mo ngaohi pehe ki hono tuki mo fakamaketi.
“Tuku pe mu’a ‘a e totongi ‘o e kava ke pule’i ‘e he maketi kae ‘oua ‘e ‘ai ia ke pule’i makatu’unga ‘i he fiema’u ‘a e tokosi’i ‘o kau ai ‘a e kau inukava ‘oku nau inukava pe mo mohe ta’e fai ha ngāue,” koe lau ia ‘a e taha ‘o e kau tō kava mei he Vahefonua Vava’u ‘oku ‘ikai loto ke fakahā hono hingoa.
‘Oku tui pe ‘a e ni’ihi 'o e kau ngoue kava ‘e ia pe ha taimi ‘e holo ai 'a e totongi 'o e kava ka ‘oku ‘ikai ko hono to’o honau faingamalie ta’e ‘i ai ha ‘uhinga lelei pea 'oku 'ikai ke faikava 'a e tokotaha kotoa 'i Tonga ni ka koe ni'ihi pe.
8 comments
-
Fakamanatu atu pe kupu 1 'etau konisitutone....... . "Pea 'e 'ata ki he kakai kotoa pe 'enau mo'ui mo 'enau mo'ui mo honau sino mo honau taimi ke kumi mo ma'u koloa pea ke fa'iteliha ki he ngaue mo e fua honau nima pea ke pule'i taafataha 'a e ngaahi me'a 'anautolu".
Fakamalo ki he kau mata loloa 'o e kuo hili. -
Tukunge e kau ngoue ke ma'u ha'anau seniti. Mou launga ki he mamafa 'a e sipi pea tuku e inu kava mo hoomou 'uno'unoa (pui[ui ange he mo Hou'eiki).
-
Kapau 'oku fu'u mamafa e totongi 'oe kava, pea 'oua e inu kava. Koena 'oku hikito pe ki 'olunga e totongi 'oe sikaleti kae kei fakatau pe ia 'ehe kau ifi tapaka. Me'a tatau kihe totongi 'oe pia moe kava malohi, mamafa pe kae kei fonu pe 'u 'otu bar moe naiti kalapu, te'eki ai ke tau fanongo tautolu kuo launga ha taha ke holoki e ngaahi totongi ko ia. Ko ho'o ongo'i pe 'oku 'ikai keke toe lava 'o fakatau ha me'i kava, malolo 'I 'api 'o mohe efiafi, tukunoa'i pe totongi ia e kava he 'oku hela e kau to kava hono tauhi 'enau ngoue he ngaahi ta'u lahi.
-
Malo Fifita e lave ki he mo'oni ko iaa, kuo hulutu'a pehee 'a e paakupaku miha 'a e kau too kavaa kuo hiki fakavalevale pehe'i ai e mahu'inga 'o e kavaa pea 'oku totonu 'aupito ke pule'i 'e he pule fe'unga 'a e mahu'inga 'o ha fa'ahinga koloa kuo hiki 'o fu'u fakavalevale pehee he 'oku 'i ai 'a e kakai tokolahi 'oku uesia ai. Ko e ta'u kuo 'osii pee na'e pa'anga 'e $25.oo pea hiki pe 'i he ta'u kuo 'osii 'o $30.00 toe hiki pe 'o $50.00 pea toe hiki 'o $60.00 pea $80.00 pea toe hiki pee 'i he ta'u kuo 'osii 'o $100.00 pea a'u 'o teau tupu ki he KILO 'E TAHA fefee fau 'a e maanumanu pa'angaa pea ko e 'ata totonu 'eni 'a e fiema'u ke pule'i 'a e hikihiki fakavalevale pehee fau 'a e koloaa? 'Ai Tonga ke ngali poto pea mo fakalotu he kuo ngalivale pea fakae'a 'a e me'a ko e maanumanu mo e ta'e 'ofa he ko e tokolahi 'oku nau inukava ko 'enau feohi pea mo e fietokoni ki he sikolasipi totongi ako ka kuo 'ikai lava lelei 'a e kaveinga mahu'inga ko iaa 'i he fu'u hikihiki fakavalevale ko'eni 'a e kava Tonga 'a hono mahu'inga. 'Io 'oku ke pule ki ho koloa ka ko 'ene hiki fakavalevale pehe'ii 'oku fiema'u ke pule'i leva ia ke tuha pea mo e hela'ia 'oku ke faii kau too kava he 'oku ongosia pee mo e kakai inu kavaa he feinga'i 'enau fo'i seenitii. Ke ma'u pee 'etau seniti kau too kava pea faka'atu'i atu si'i kau inukavaa. 'Oku ou to kava pea ko e taimi 'e 'aonga ai 'eku kava te fakatau atu ia 'i ha mahu'inga fe'unga pee ke tuha mo e hela na'a ku faii. Ko 'eku fokotu'u atu ki he pule fe'unga holoki 'a e mahu'inga 'a e Kava Tonga kilo 'e tahaa ki he pa'anga 'e $50.00 ki he kilo pea lele 'aki ia pea ko e mahu'inga 'eni 'e fakatau'aki 'a 'eku kavaa 'e ma'u 'a 'eku seniti pea mo'ui pee mo e kau inu kavaa. Malo
-
Kuo mao e langa e ngaahi fale kalapu ia kae 'ikai ma'u ha holo ia ...hahahahah.. pea 'ikai ma'u mo ha me'i kava .. ko hai na'a ne 'ilo 'e fakalaka e kava he puha moa 'oku fua'aki etau kavenga ..malie lahi
-
TUKU PE MU'A KE SI'I FAITELIHA PE TOKO TAHA TO KAVA KI HE MAHU'INGA HE OKU TAKI TAHA FAITELIHA PE KAU TO MELENI MO E NHAAHI NGOUE KEHE KI HE MAHU'INGA OKU NAU TUKU ATU AKI ENAU NGOUE,KA OKU KE MAMAFA 'IA HE MAHU'INGA OKU FK TAU ATU 'AKI E KAVA PEA KE ALU O TO HA'O KAVA KEKE FAITELIHA KI HONO MAHU'INGA KEKE FK TAU ATU 'AKI, ko e anga pe ae sio mei he tapa'i laine, tu'a ofa Eiki atu.
-
Ki he kakai koena oku hela he ngaue'i e pa'anga ke kumi e kava, mou laka o kumi e wine oku ma'ama'a. Taofi atu mo e kalapu sikolasipi ia kapau oku ikai toe lava o hiki e fea kalapu oku eke he falekalapu.
Ka ko e fakapotopoto taha, ai atu e rate ke kehekehe, kapau ko ha kava faikava e ilo pe he lahi oku ave, pea ai atu ke ma'ama'a, kapau ko ha uta ki muli e ilo he lahi oku order pea hiki atu ia ki he 'uto o setane -
Mahino eni ko e kau to kava pe 'oku hela he ngaue'i e kava...fefe nai si'i kakai 'oku hela he ngaue'i e pa'anga ke kumi 'aki e kava?...fefe nai ngaahi kalapu si'i feinga sikolasipi ki he totongi ako e tukuhausia he ngaahi kolo?...'okapau kuo ikai lava pule'i e totongi fefe ke 'ai a e lahi e me'i kava 'oku fakatau ke ngali poto..fefe fau 'etau masiva kuo tekeutua pehe ai e manumanu....