Ta’efiemālie tokolahi kau pisinisi kaniseli Sipoti ^Featured

‘Oku mahino ngofua pe foki ‘eni he na’e ‘i ai ‘a e tokolahi ‘o e kau pisinisi 'i he fonua na’a nau ‘amanaki lelei ki he sipoti koha hū’anga pa’anga lelei ki he’enau ngaahi pisinisi.

'Ikai ngata ai ka na'e hoko 'a e teuteu ki he Sipoti koe faka'ai'ai moha fa'ahinga me'a ke fai e sio ki ai moe amanaki lelei pea ongo lelei 'i he ngaahi fokotu'utu'u pisnisi na'e fakahoko 'o kau ai hono tohoaki mai 'a e kau 'inivesitoa ki Tonga ni.

‘Oku kau heni ‘a kinautolu he sekitoa takimamata, ngaahi hōtele mo e ngaahi nofo’anga mo talitali’anga kakai, ngaahi falekai, ngaahi falekoloa, ngaahi naiti kalapu, kautaha vakapuna, kau ngoue, pehe ki he kau fakamaketi angamaheni ‘i he ngaahi sipoti mo e ngaahi pisinisi lahi ‘i Tonga ni.

Na’e fakahā ‘e Lolesio Lui koe tangata pisinisi ki he mamata tofua’a mo e ngaahi keimi toutai ki he ongoongo ‘a e ABC ‘oku totonu ke liliu ‘a e fakakaukau ‘a e Pule’anga tautautefito ki he taimi ‘oku ofi mai ai ‘a e ngaahi faingamalie hangē koe sipoti.

Na’a ne toe fakahā foki koe mole lahi ‘eni ‘a e faingamalie fakamaketi ki Tonga ni pea ‘oku ‘āsili ai pe ‘a e holomui ‘a Tonga ‘o sio mui’ulu ‘i Ha’amoa mo Fisi ‘o hono tohoaki mai ‘a e fakalakalaka.

'I he fakamatala 'oku ma'u na’e ‘i ai ‘a e ngaahi langa falenofo’anga mo e ngaahi pisinisi kehe pe na’e fakataumu’a tenau ma’u ha monū ‘i he faingamālie ko’eni ka ‘oku mahino mai kuo mole atu ia.

‘I he fakamatala ‘a e taha ‘o e kau pisinisi ka ‘oku ‘ikai loto ke fakahā hono hingoa ‘oku ongo ‘a e tā ko’eni kiate kinautolu he na’e fai ‘a e amanaki ke ‘ahi’ahi’i mo taukei’i ‘a e fa’ahinga monū pehe ni kuo ‘ausia ‘e Ha’aamoa, Fisi, Tahiti mo e ngaahi fonua kuo fakahoko kiai ‘a e Sipoti ‘a e Pasifiki.

'I he'ene fakamatala na'a ne pehē ai na'e teuteu kenau hū mai 'a e ngaahi koloa lahi mei tu'apule'anga teuteu ki he sipoti pea 'oku tanaki ai 'a e tukuhau lahi 'a e Pule'anga tukukeheange 'a 'enau palani 'e ma'u ai mo 'enau seniti.

Na'e hoko atu 'ene fakamatala mo 'ene pehe ko kinautolu 'oku lahi taha 'enau totongi tukuhau pea koe tokolahi 'o e kau longoa'a mo poupou ki hono ta'ofi 'a e sipoti tautatefito ki he mitia fakasosiale 'oku 'ikai kenau totongi ha tukuhau pea 'oku 'ikai kenau mahino'i 'a e 'ikonomika mo e tukuhau.

Ko e me'a tatau nae fakahā 'e he pule 'o e taha 'o e ngaahi hōtele na'e fai e 'amanaki ke fakahoko hano ki'i saupulu 'a e hōtele mo fakalahi 'i he teuteu ki he Sipoti ka kuo muahino mai 'e 'ikai hoko 'eni.

"'Oku 'ikai kemau tukuaki'i 'a e Pule'anga ka 'oku mau faka'amu ange mai kapau na'a nau loto lahi he na'a mau si'i mei ma'u faingamalie mei ha fu'u kakai tokolahi tenau ha'u ki Tonga ni." ko e fakamatala ia 'e he fefine ni.

‘Oku ngalingali ‘e toe fakahoko pe ‘a e Sipoti Pasifiki 2019 ki Ha’amoa pe ko Fisi.