‘Uakai mai ‘a Nu’usila ki he ngaahi koloa fo'u mo ngaohi mei he Pasifiki Featured
'Ata 'o e ngaahi koloa 'o e ngaohi mo fo'u 'i Tonga ni
30 Ma’asi, 2017. ‘Oku mahino mai foki ‘a fuu ‘ilonga ‘a e makape ki ‘olunga ‘a hono fiema’u lahi ‘i Nu’usila ‘a e ngaahi koloa fo’u mo ngaohi mei he Pasifiki tautautefito ki he me’akai mo e inu.
‘Ikai ngata ai ka kuo fakaha mei he Komisiona ki he fekatau’aki ‘a e Pasifiki (Pacific Island Trade and Investment) ‘i ‘Aokalani Michael Greenslade ‘i ha’ane fakamatala ki he Letio Nu’usila ‘oku vekeveke ‘a e ngaahi kautaha ‘oku nau tufaki mo fo’u ‘a e me’atokoni mo e inu ke fakamo’oni ha ngaahi va fengaue’aki mo e ngaahi fonua ‘o e Pasifiki.
‘I he’ene fakamatala ‘oku faka’ohovale ki he ngaahi kautaha lalahi ‘i Nu’usila ‘a e kualati lelei mo ‘okeniki ‘o ‘ikai ngaue’aki ha kemikale ‘a e ngaahi koloa ‘oku fo’u mo ngaohi mei he Pasifiki pea ‘oku kau foki heni mo Tonga ni.
‘Oku mahino foki mei he fakamatala ko’eni koe ngaahi koloa fo’u mo ngaohi mei he Pasifiki ‘oku kualati lelei (good quality) mo mahu’inga makehe ‘i he maketi ‘a Nu’usila he ‘oku makehe pea ‘oku nau mahino’i hono mahu’inga mo e tu’unga faka maketi ‘oku totonu ke ‘i ai.
Ko e ongoongo fakafiefia foki ‘eni ki he ngaahi fonua 'o e Pasifiki ‘o kau ai mo Tonga ni ‘a e mahino mai ‘oku ava ‘a e matapa ki he fefakatau’aki pea ‘oku toe fakalakalaka pe foki mo e ngaahi koloa kehe hange koe me’a teuteu ‘oku fo’u mo ngaohi mei he ngaahi fonua ‘o e Pasifiki.
Ko 'etau koloa ngaohi mei Tonga ni tukukehe ange 'a e ngaue fakamea'a mo e me'a teuteu huhu'a 'o hange koe kilimi milimili mo e lolo niu moe ha fua ko e ngaahi me'a tokoni ngaohi mei he vanila, niu mo e fua 'o e fonua 'oku fu'u fiema'ua 'o kau ai mo e kofi foki.
