Ta'efakalao Tu'utu'uni Pangike Pule: Talekita Pangike PICB ^Featured

‘Oku ou fuofua ‘oatu ‘a e faka’apa’apa lahi ki he kau Kasitomaa ‘ a e PICB ko e ‘uhi ko e tu’utuuni fakatupakee ‘a e Pangike Pule ‘o kaniseli ‘a e laiseni ngaue fakapangike ‘a e PICB ‘o ‘ikai lava ai ha mateuteu ‘a e PICB ke fakahaa atu kiamoutolu kei taimi, pe ke mau lava ‘o fakahoko ho’omou fiema’u fakapangike ‘i he ngaahi ‘aho si’i kuo maliu atu.

Ko e mo’oni ne kaniseli ‘e he Pangike Pule ‘a e laiseni ngaue fakapangike ‘a e PICB ‘i he ‘aho 26 ‘o Siulai 2016. Ko e founga ne fakahoko mai ‘a e tu’utu’uni ko ‘eni, ne fakahoko meili mai ‘i he efiafi Tusite ‘aho 26 ‘o Siulai 2016, pea toki tufa mai ‘a e tohi ‘i he pongipongi ‘o e ‘aho Pulelulu 27 ‘o Siulai 2016.

Ne ‘ikai pe ha fakatokanga pe fakapaa mai pe ‘a e Pangike Pule, hili ko ia ne fai ‘a e fakataha ‘a e PICB moe Pangike Pule ‘i he ‘aho Falaite ‘aho 22 ‘o Siulai 2016, pea ‘ikai ha fakahoko mai ‘oku lolotonga fakakaukau’i ‘e he Pangike Pule ke kaniseli ‘emau laiseni mo hono ngaahi ‘uhinga.

‘Oku faka’ikai’i malohi ‘e he PICB ‘a e tu’utu’uni ta’efakalao ko ‘eni, ‘o fakatatau ki he Lao ki he Ngaahi Kautaha Faka-Pa’anga ‘o e 2004, ‘a ia ‘oku tohi ‘i he Kupu 10 (2) ‘o pehe –
Kupu 10 (2):

(a) “ Kuo pau ki he Pangike Pule ke ne ‘oatu ki he tokotaha ma’u laiseni –

(i) Ha fanongonongo tohi ‘o ‘ene taumu’a ke fakafepaki ‘a e laiseni; pea

(ii) ‘I loto ‘i ha ‘aho ngaue ‘e 10 mei he ‘aho ‘o e fanongongo ha faingamalie ke fakahu ange ‘a e ngaahi ‘uhinga ‘oku ‘ikai totonu ke fakafoki ai ‘ae laiseni"

Ko e toutou fanongonongo ‘a e Pangike Pule ‘i he mitia ne ‘omai ‘a e fakatokanga ‘i he ta’u 2015 ‘o makatu’unga ai ‘enau tu’utu’uni ‘i he 2016, ‘oku hala fakalao mo ia. Ka koe mo’oni, ‘i he ‘aho 30 ‘o Sanuali 2015 ne ‘omai ‘a e fanongonongo tohi ‘a e Pangike Pule ki he PICB fekau’aki mo ‘enau taumu’a ke kaniseli ‘a e laiseni ngaue fakapangike ‘a e PICB.

Pea hili ‘a e fakahu ‘a e ngaahi ‘uhinga ‘a e PICB ‘oku ‘ikai totonu ke kaniseli ‘a e laiseni, ‘i he ‘aho 2 ‘o ‘Epeleli 2015, ne ‘omai ‘a e tohi tali ‘a e Pangike Pule ‘o fakahoko mai kuo tamate’i ‘e he Pangike Pule ‘a e fakatokanga ko ‘eni, ne omai he ‘aho 30 ‘o Sanuali 2015.

‘Oku mahino mai ne ‘osi tamate’i ‘a e fakatokanga tohi ‘i he 2015, ka ‘oku toe fakamo’ui pe ‘ehe Pangike Pule ‘a e fakatokanga kuo ‘osi tamate’i ke ngaue’aki ‘enau tu’utu’uni ke kaniseli ‘a e laiseni ‘a e PICB ‘i he 2016. ‘Ikai ngata pe ‘i he ta’efakalao mo ta’efakapotopoto ‘a e founga fakahoko ‘a e tu’utu’uni, ka ne ‘ikai ke fakakaukau’i ‘ehe Pangike Pule ‘a e uesia moe maumau lahi ‘e hoko koe ‘uhi koe fakatupakee ‘a e tu’utu’uni.

Ne fai’a e feinga lahi ‘a e PICB ki he Pangike Pule ‘i he ‘aho Pulelulu 27 ‘o Siulai 2016 ke fakatonutonu ‘enau tu’utu’uni pea tali tohi mai ‘e he Pangike Pule he ‘aho tatau, ‘oku tu’uma’u pe ‘enau tu’utu’uni.

Neongo ia, ne toe feinga pe ‘a e PICB he ‘aho Falaite 29 ‘o Siulai 2016 ‘o fakahoko ‘a e tautapa faka’osi ki he Pangike Pule ke fakafoki ‘a e tu’utu’uni ka e ‘omai ‘a e fakatokanga ‘o fakatatau ki he lao. Neongo ‘a e ngaahi feinga ni, ne fakahoko tohi meili mai ‘a e Pangike Pule ki he PICB ‘i he efiafi Falaite ‘aho 29 ‘o Siulai 2016, ‘oku kei tu’uma’u pe ‘a e tu’utu’uni ke kaniseli e laiseni ‘a e PICB.

Ko e tu’uunga lolotonga ‘o e PICB ‘oku mau feinga pe ke fakakakato ‘a e fiema’u toho pa’anga ‘a e kau Kasitoma mei he ‘aho ni, ‘o fakatatau pe ki he tu’utu’uni ‘a e Pangike Pule, he kuo mahino mai ‘oku ‘ikai ke toe fie fanongo mai ‘a e Pangike Pule ki he tangi ‘a e PICB ke foaki mai ‘emau totonu fakalao.

‘Oku mau fie fakamahino atu ki he kau Kasitoma Fakahupa’anga (Depositors) ‘oku malu ho’o mou silini pea ‘oku ‘ataa ke mou toho ho’o mou silini, kapau ko ho’o mou tu’utu’uni tau’ataina ia.

Koe kau Kasitomaa Noo (Borrowers) ‘oku mau fie fakamalo lahi atu he ko e tokolahi ‘ia kimoutolu kuo mou ‘a’ahi mai ki Pangike ni he ngaahi ‘aho kuo maliu atu ke fakahoko ho’o mou totongi noo.

‘E toki fakahoko atu ‘a e founga ki he taa fakafoki ‘a e ‘u noo ‘i he kaha’u vave mai, ka ‘oku mau hounga’ia ‘i ho’o mou kei poupou mai ke ta fakafoki ho’omou noo ki he PICB he na’e fakafaingamalie’i atu ‘ehe PICB ho’o mou fiema’u pa’anga ‘i he taimi na’a mou kole tokoni mai ai.

Koe ’uhi koe ngaahi maumau lahi kuo hoko ‘i he tu’utu’uni ta’efakalao ‘a e Pangike Pule pea moe ‘ikai lava ke nau tali ‘a e fakatonutonu ne kole ‘ehe PICB ‘i he uike kuo’osi, ‘e fakahoko ‘e he PICB ‘a e fakatonutonu fakalao ‘i he vave taha.

‘Oku mau ongo’i lahi ‘a e uesia ki he Kau Ngaue ‘a e PICB moho nau Ngaahi Famili, kae pehe foki ki he Kakai tokolahi ‘o e Fonua ne nau ‘amanaki lelei ki ha taimi ‘i he kaha’u, ‘e lava ‘o tokoni’i kinautolu ‘e he PICB ‘i he ‘enau fiema’u fakanoo.

Neongo ‘oku fai ‘a e fakatonutonu fakalao, pea koe ola ‘o e fakatonutonu ‘e toki mahino ‘a mui, ka ‘oku ou fokotu’u atu ke ‘oua ‘ai ke hoko eni ko ha sipinga ‘a e founga pule ‘a e fonua ni, ke lava ngofua ‘a e tu’utu’uni ta’efakalao ‘o ‘ikai ‘omai ha faingamalie ke ‘oatu ‘a e le’o ‘o e tokotaha ‘oku felave’i mo e tu’utu’uni, ke veteki pe kimautolu pea vahe ‘a e koloa ‘a e kautaha mo ta’ofi fakatupakee ‘a e ngaue moe kaha’u ‘a e Kau Ngaue ‘o e kautaha, lolotonga ‘oku mau kei sio atu pee.

'Oku ‘oatu ‘a e fakamalo makehe ‘i he loto hounga mo’oni ki he Kau Kasitomaa ‘a e PICB ‘i ho’o mou poupou moe fie tokoni ki he taumu’a vivili mo tu’ukimu’a ne fokotu’u ai ‘a e PICB – ke holoki ‘a e totongi tupu ‘o e noo fakapangike, pea mo mau faka’ataa ‘a e noo ‘i he totongi tupu ma’ama’a mo faka’atu’i ki he ivi fakapa’anga ‘o e Kakai ‘o e Fonua, ‘o fakatatau ki he tu’unga moe ‘atakai faka’ekonomika ‘o Tonga.

‘Oku ‘oatu ai pe ‘a ‘emau talamonu ki he Tonga kotoa ‘i he ‘etau ngaahi taumu’a ngaue langa fonua, pea moe poupou ki hono langa hake ‘a e tu’unga faka’ekonomika hotau fonua tupu’anga mo ‘ofa’anga.

Faka’apa’apa atu Mei he Pule Lahi mo e Talekita – Mishka Tu’ifua moe Kau Ngaue kotoa ‘a e PICB