'Ulungia 'Ikale Tahi 'i Fisi 'i he Pa'ake Teufaiva 50-19
6 Sepitema 2024. Kuo toe 'ulungia 'a e timi 'Ikale Tahi 'i he timi 'a e Fisi 'aki 'a e kai koe 50 ki he 19 'i he Pa'ake Teufaiva 'i he efiafi 'o e 'aho ni.
Ko e 'ulungia hokohoko 'aki 'eni hono 5 'a e 'Ikale Tahi pea na'e malolo 'a e tau ni 'oku 26 'a Fisi ki he 19 'a e 'Ikale Tahi pea na'e 'ikai ke toe 'i ai ha kai 'o e 'Ikale Tahi 'i he tu'u hono ua 'o e va'inga.
Neongo 'a e faka'amu ke kei fai poupoua 'a e timi 'a e 'Ikale Tahi 'e he fonua ka 'oku hoko 'a e ola kovi 'o e ngaahi va'inga 'a e 'Ikale Tahi ke fehu'ia lahi ai 'a e tu'unga hono fakalele 'o e timi fakafonua ko'eni 'a Tonga.
'Oku matu'aki mahino 'a e mama'o atu 'a e tu'unga va'inga ia 'a Fisi mo Ha'amoa pehe ki he ngaahi timi na'a tau fetuotuani malie he kuohili kae hange 'oku puna fakaholomui 'a e timi ia 'a 'Ikale Tahi.
Ko e founga fakalele 'o e 'Ikale Tahi 'e he Poate 'Akapulu 'a Tonga 'oku totonu pe ke toe fakahoko ha vakai kiai he 'oku a'u 'eni ki he tau tesi 'a e 'Ikale Tahi 'i he Pa'ake Teufaiva 'oku 'ikai pe ke tokolahi 'o hange koe ngaahi ta'u ki mu'a atu.
'Oku 'ikai pe ke ongona fefee pe longo mo'ui ha tu'uaki pe ko hano fakamaketi'i ia 'o e ngaahi va'inga 'a e 'Ikale Tahi 'i Teufaiva pea 'oku hanga 'e he vaivai 'a e poupou kene holoki 'a e mafana mo e ivi va'inga 'o e kau va'inga.
Ko e kaveinga 'e taha 'a hono teueu'i 'o e kau va'inga pehe ki he malava ke 'ataa 'etau kau va'inga 'i tu'apule'anga kenau kau mai ki he 'Ikale Tahi.
'Oku totonu ke tali 'e he fonua 'oku fu'u fiema'u 'a e ngaue lahi ke fakahoko ki he 'Ikale Tahi.
