‘Ave 'a e lelei taha!! Featured
'Ikale Tahi mo Siapani 'i hetau'i Ipu 'a e Pasifiki
8 Sepitema, 2016. Neu sio hifo he taha e ngaahi nusipepa tokua ko e ‘Ikale Tahi kuopau ke fili atu e peseti ‘e 15 mei he fanau va’inga fakalotofonua ki ai, ‘a ia kuo ‘osi ‘i he Konisitutone eni ‘a e ‘Akapulu.
Ko e mahino ki he motu’a ta’e’akapulu ko au ‘oku pehe; tuku e tamaiki lelei ‘i tu’apule’anga ne nau mei tau he ‘Ikale Tahi kae ‘oatu e kau va’inga fakalotofonua koe’uhi pe koe Konisitutone.
‘Oku hange eni ia ha fo’i mali kuo fai hono fakamatu’a’i, pea ‘osi ia kae si’i faka’ofa e faiako ia hono feinga’i ke ma’u ha ola mei heni. ‘Oku ‘ikai ‘uhinga eni ko ha sio lalo ki he kau va’inga fakalotofonua.
Ne tau ‘osi sio ki he ola e kau va’inga fakalotofonua he fe’auhi ‘a e ngaahi timi A , hala he fo’i malohi pea toe fo’i he timi ta’u 20 ‘a Siapani. Ko e kau va’inga fakalotofonua ‘oku nau ma’u e taleniti mo e loto lahi. Ko e me’a ‘oku toe koe teu’i 'oku lahi 'aupito.
Koe me’a ia ‘oku fiema’u ki he komiti ‘akapulu ‘a Tonga ni, kamata hake teuteu mei lalo pea ‘osi e fakakalapu pea fakavahe pea hoko hake ai ki he Aoniu, Timi Fakalakalaka , Tonga A pea toki unuhi hake ki he ‘Ikale Tahi ‘i hano fili.
Ko e me’a ia fiema’u ke ‘ave fanau va’inga fakalotofonua ha timi fakalakalaka ke nau folau ‘o va’inga ‘i Nu’usila mo ha ngaahi kalapu ai. ‘E ako ai e kau va’inga pea ‘e malava ke ‘ave ai pe nautolu ‘e ha kalapu. Ka fai tu’o taha pe ua eni he ta’u, pe koe kolosi atu pe ki Fisi pe ko Ha’amoa kou tui ‘e ako lahi e fanau fakalotofonua.
Ko e tu’u he taimi ni ‘oku pehe ni. Tau fakaako ‘osi pe ia hiki hake tau faka-kalapu pea sio leva ia ki he Tonga A mo e ‘Ikale Tahi. Fiema’u e ngaahi fe’auhi fakalotofonua ke teu’i lelei ai e fanau he ko e taleniti ‘oku lahi ‘aupito ka ‘oku fiema’u e fokotu’utu’u ‘a e Poate moe Komiti ‘Akapulu ke maau mo lelei.
Kuo kehe levolo ia ‘o e va’inga fakavaha’apule’anga he taimi ni pea kuo kamata ke fakalaka e ngaahi fonua hange ko Georgia ‘i Tonga.
Tau sio ki he’etau timi toko 7. Malo si’i feinga ‘a e fanau. He’ikai te tau fili atu pe fanau va’inga mei ha fo’i fe’auhi fakalotofonua pe ‘e taha pe ua. Ha ‘oku koula ai ‘a Fisi?. 'Oku 'uhinga ia he ‘oku nau va’inga mo fe’auhi toko 7 nautolu mei Sanuali ki Tisema.
Kou tui ke ‘ave lelei taha pea teu’i lelei e ngaahi polokalama ke ‘ohake lelei ‘etau fanau va’inga fakalotofonua kae lava ke a’usia ‘etau faka’amu he ‘e lava pe 'e he ‘ova he peseti ‘e 15 e kau va’inga fakalotofonua ka ke tomu’a teu’i lelei kinautolu.
Ko e Mata Lafo Lau Kai
