Fakahoko Faka’ali’ali Ngoue hili hano toloi ta’u ‘e tolu
31 Me, 2023. ‘Oku ‘amanaki ke fakahoko ‘a e Māa’imoa Faka’ali’ali Ngoue ‘a ‘Ene ‘Afió ‘i he ta’u ni, hili ia ha ‘osi e ta’u ‘e tolu mei hono fakahoko fakamuimuí ‘i he 2019.
Fakatatau ki he fakamatala 'a e Pule Lahi ‘o e Potungāue Ngoué, Me’atokoní mo e Vaotātā, Dr. Viliami Manu ‘oku mateuteu ‘a e Potungāue ke fakahoko ‘a e Faka’ali’ali Ngoué ‘i he ta’u ni ‘aki ‘a e kaveinga ko e “Langafonua mei he Hunga-Tonga-Hunga-Ha’apai mo e Covid-19.”
‘Oku 'amanaki ke kamata pē ‘a e Faka’ali’ali Ngoué ‘i Tongatapu ni ‘i he ‘aho 10 ‘o Sune, hoko atu ai pē ki he Vahefonua ‘Euá ‘i Sune ‘aho 17, Ha’apai ‘i Siulai 13, Vava’u ‘i Siulai ‘aho 20, pea ‘e faka’osi ki he Ongo Niuá ‘a ia ko Niutoputapu ‘i he ‘aho 26 pea ko Niuafo’ou leva ‘i he ‘aho 27 ‘o Siulai.
‘Oku mahino pē foki ‘a e uesia na’e hoko ki he ngoué hili ‘a e mo’ungaafí pea ‘oku fakataumu’a ‘a e kaveingá ki he langa hake ko ia mei he ngaahi maumau na’e hoko ‘i he efú. Pea kau foki ki ai mo e uesia ‘a hono uta atu ki muli ‘a e fua ‘o e ngoué tupu mei he fakataputapui ‘o e Covid-19.
“Ko e ngoue na’e uesia lahi taha ‘i he hili ‘a e mo’ungaafí ko e ‘ufi ta’u lahí mo e ‘ufi lose.
‘Oku mahino pe taimi ni he ‘oku ‘ikai ke toe fu’u lahi ‘ene ‘así ka e pehē foki ki he ‘ikai ke toe lahi ‘a hono uta atu ki mulí. Ko e anga mahení na’e fika ‘uluaki ma’u pe ‘a e manioké pea fika ua hake ‘a e ‘ufi losé ‘i he lahi ‘a hono uta atu ki he fonua mulí.”
Taimi tatau pē na’e fakahā ‘e Dr. Manu ‘oku ki’i kaka hake he taimi ni ‘a e tu’unga ‘oku ‘i ai ‘a hono uta atu e fua ‘o e ngoué ‘o tautautefito ki he manioké.
Ko e faka'ali'ali ngoue foki 'eni mo e ngaahi ngaue'anga 'a ia 'oku malumalu 'i he Potungaue Fefakatau'aki mo e Langa Fakalakalaka Faka'ikonomika pea 'oku kau foki kiai mo e Takimamata.
'Oku mahino foki 'oku vekeveke 'a e kakai 'o e fonua ki hono toe fakahoko ko'eni 'a e taha 'o e ngaahi katoanga lalahi 'oku anga maheni kiai 'a e fonua.
