Puke kau polisi ni'ihi fekau'aki mo e kau kengi heka paiki Comanchero
12 Sepitema 2024. Na'e toe puke 'ehe kau polisi ha toko 2 ta'u 35 moe ta'u 44 fekau'aki ai pe mo 'ena fengaue'aki mo e kau kengi heka paiki ko e Comanchero.
Na'e fakahoko 'e he kau polisi 'a e puke ko'eni fakataha mo e pa'anga, ngaahi teunga koe saketi, ngaahi huti, ngaahi vesi mo e falani 'oku tohi ai 'a e hingoa 'o e kau kengi ko'eni.
Ko e tokoua ko'eni na'e puke ia 'o fakatatau ki he lao Counter Terrorism and Transnation Organized Crime pea 'oku tukuaki'i koe toko ua ko'eni koe tauhi pa'anga ia pehe ki he pule 'o e kau kengi ko'eni 'a ia 'oku fa'ufa'u ke fokotu'u 'i Tonga ni.
Na'e puke pe foki 'e he kau polisi 'a e ni'ihi 'o e kau kengi ko'eni fakataha mo e ni'ihi 'oku tukuaki'i ki he hia ko e fa'ufa'u ke fokotu'u ha kulupu faihia 'o kau kiai mo hono fe'ave'aki 'o e faito'o konatapu.
'Oku vikia foki 'e he kakai 'o e fonua 'a e Potungaue Polisi ki he ngaue lava me'a ko'eni pea 'okui kau 'eni he nga'unu tonu ke ta'ota'ofi 'a e fa'ahinga kulupu fai hia pehe ni mei ha'ane tu'u 'i he fonua.
Ko e kulupu kengi heka paiki ko'eni koe hu'u mei 'Aositelelia.
