Kingi Siaosi Tupou I Featured
Kingi Siaosi Tupou I
‘Oku faka’apa’apa ‘a e Kolomu fo’ou Kohai ‘a Hai? (Who is Who?) pea mo e kole ke tomu’a fakamalumalu he talamalu ‘o e fonua pea ‘ofa ke ‘atā pea ‘ofa ke ngofua kae fakaava ‘a e kolomu ni ‘aki ha’a tau vakai ki he ‘Uluaki Fā ‘o Tonga Kingi Siaosi Tupou I ka koe Helo mo e Tufunga Fonua ‘o e Piliote. Hangē koe lea ‘oku taka “Mapaki e Fā kae kei ‘Alaha”.
Na’e ‘alo’i ‘a Tāufaʻāhau ‘a ia na’e toe ‘iloa ko Tupou Maeakafaua Ngininginiofolanga ‘i he ‘aho 4 ‘o Tisema ‘o e ta’u 1797. Fakatatau ki he lau ‘a e kau fai histōlia, na’e ‘alo’i ‘a e tama ‘i Ha’apai ‘i Niu’ui pe ko Tongaleleka ‘i Lifuka. ‘Oku ‘i ai mo e ma’u tokua ko Tongatapu ‘i Fualu pea neongo ‘oku hoko ‘a e tipeiti lalahi ai ‘a e kau fa’u hisitōlia pehē ki ha’a ‘ilo’ilo he tala ‘o e fonua ka ‘oku ‘ikai tuku ‘a e fekeli ki he mo’oni.
Ko e ‘Ene ‘Eiki ko Tupouto’a ‘a ia koe Tu’i Kanokupolu ia hono 17 neongo na’e ‘i ai ‘a e ngāngā’ehu ‘i he vā ‘o Tupouto’a mo e ngaahi Ha’a lalahi ‘o e fonua ‘o kau ki ai ‘a e Ha’a Havea Lahi. Ko ‘Ene Fehuhu ko Hoamofaleono pea na’e ohi hake pe ‘a e Tama ‘i he Fo’i ‘One’one ‘o makatu’unga ‘i he fekuki fakapolitikale ‘o e ‘aho koia.
Na’e fakanofo ‘a Taufa’āhau koe Tu’i Ha’apai ‘i he 1820 kimu’a pea hala ‘ene ‘Eiki. Na’a ne tali ‘a e Lotu Faka Kalisitiane pea papitaiso ia ‘i he ta’u 1827 ‘aki ‘a e hingoa ko e (Siaosi) ‘o tauhingoa ki he Tu’i Pilitānia ko Siaosi (King George). Na’a ne hoko ko e Tu’i Vava’u ‘i he ta’u 1833 hili ia ‘a e pekia ‘a hono leuleumāfana Fīnau ‘Ulukālala III ‘a ia na’e ‘iloa koe Tu’i Vava’u.
Na’a ne fakangata ‘a e nofo pōpula ‘a e kakai ‘o e fonua ‘i he ta’u 1835 pea na’e fokotu’u ‘a e Lao Vava’u ‘i he 1838 (Code of Vava’u) ‘a ia koe fuofua lao ia na’e tohi ‘i he fonua. Na’e hoko ‘Ene Langi Mama’o ‘one momoi ai ‘a Tonga ki Langi ‘i he ta’u 1839 (Tuku Fonua Ki Langi) 'a ia oku kei laukau ai 'a e fonua moe lotu 'i he 'aho ni.
Na’e lahilahi ke ‘Afio pe ‘i Veitatalo ‘i Vava’u he na’e melino mo tu’umalie ange ‘a Vava’u he ‘aho koia lolotonga ia ‘oku hoko ‘a e ngāngā’ehu mo e tau fakalotofonua ‘i Tongatapu. Na’e ngata ‘a e tau ko’eni ‘i he ta’u 1852 hili hano fakangata ‘e he ‘Uluaki Fā ‘a e moveuveu ‘i he fonua pea mo hono tali ‘e he tokolahi ‘a e Lotu Faka Kalisitiane.
Na’a ne fuofua Fakaava ‘a e fuofua Fale Alea ‘i he ‘aho 4 ‘o Sune 1862 pea ‘oku kei fakamanatua ‘o a’u ki he ‘aho ni koe ‘aho ‘o e Tau’atāina (Emancipation Day). Na’e hoko atu ai ‘Ene maa’imoa ki hono fatu ‘o e Konistūtone ‘o e fonua ‘a ia na’e fale’i ia ‘e he kau misinale pea na’e fakahā faka’ofisiale ‘i he ‘aho 4 ‘o Nōvema 1875 ‘a ia ‘oku fakamanatua moia ‘o a’u ki he ‘aho ni.
Na’e Hala ‘a e Laione ‘o e ‘Otu Felenite ‘i he ta’u 1893 ‘i hono ta’u 96 pea na’e telio pe ‘i Mala’ekula. ‘Oku hoko ‘a ‘Ene ngaahi maa’imoa koe ngaahi poutuliki ia ‘o Tonga ‘o a’u ki onopooni.
