"Me'angāue'aki Au Pea Li'aki" Paea Wolfgram ^Featured

‘Oku ‘uhinga ‘eni ki hono ‘ohake ‘i he feme’a’aki ki he patiseti ‘a e fonua ‘a ia ‘oku lolotonga tepile’i ‘i he Fale Alea ‘O Tonga he lolotonga ni ‘a e ngaahi 'isiuu fekau’aki mo e teuaki ki he sipoti pea mo hono fehu’ia ‘a e ngaahi founga ngāue ‘oku fakahoko kiai 'e he Pule'anga mo e Komiti Fokotu'utu'u.

Lolotonga ‘eni kuo fakahū atu ‘e he ‘Eiki Minisitā Pa’anga Malōlō Lisiate ‘Akolo ha’a ne tohi ki he ‘Eiki Palēmia pea na’a ne toe lava atu foki ‘o fakahoko ‘a e fakataha moia ke fakahā ‘a ‘ene ta’efiemalie mo 'ene hoha’a ki he fokotu’utu’u ki hono teuaki fakahoko mai ‘a e sipoti ko’eni ki Tonga ni ‘i he ta’u 2019.  ‘Oku ‘uhinga lahi ‘a e tohi ‘a ‘Akolo ki he palopalema fakapa’anga ‘e fehangahangai mo e fonua moe ngaahi hoha'a kehekehe pe ka 'oku nau felālāve'i..

‘Oku tafunaki atu foki ‘eni ki he ngaahi kaveinga fekau’aki mo e ngaahi tukuhau ‘oku fakahangahanga mai ke hilifaki ‘i he tikite vakapuna (Departure Tax) mo e fe’ave’aki pa’anga mei muli (Foreign Exchange) ‘a ia ‘oku lolotonga talanga’i lahi ‘i he fonua pea kuo ‘osi ‘oatu ‘ehe ngaahi mitia.

‘Oku mālie he ‘oku ‘asi mai foki ki mu’a ‘a e Tamasi’i Koula ‘a Tonga ko Paea Wolfgram ‘a ia na’a ne fakafofonga’i ‘a e fonua ‘i he fuhu pauni mamafa ‘i he ‘Olimipiki ‘i Atlanta ‘i he 1996. ‘Oku ‘ikai sola ‘a e tangata ni he koia na’a ne ‘omai 'a e metali siliva ma’ae fonua pea koe hisitōlia ia ki he fo’i piliote ‘a ia ‘oku taumama’o ki ha fonua si’isi’i hangē ko Tonga.

Kuo fakahā foki ‘e Paea Wolfgram ‘i he mītia faka sōsiale (social media) ‘oku totonu ke tali ‘a e komiti ko’eni ‘oku nau fakahoko ‘a e fokotu’utu’u ki he sipoti ki he ngaahi hoha’a ‘a e fonua pea ‘oku fiema’u ha tali ‘oku mālie mo mahino. Na’e fakafehu’i foki ‘a Wolfgram ‘e ha tokotaha lolotonga ‘a e tālanga ko’eni ‘i he mītia faka sōsiale (social media) pe ‘oku kau ki he kōmiti pea na’e fakahā ‘e Paea na’a nau me’angāue ‘aki pe ia ki hono feinga’i (bid) ke fakahoko mai ‘a e sipoti ki Tonga ni pea talu ai.

Na’e hoko atu ‘a Wolfgram ‘o pehē na’a ne faka’amu mo kole ke fakakau ia ki he Kulupu Ngāue (Working Group) ka na’e ‘ikai ke ola lelei ‘eni. ‘Oku ‘ikai foki faka’amu ‘a Wolfgram ‘i he tu’unga ‘oku a’u atu kiai he taimi ni ke hoko ‘a e sipoti ko’eni kene fakangalivale’i ‘a e fonua. Na’a ne toe fakahā pe foki ‘oku ‘ikai ha’a ne fiema’u ke toe kau ki ha fokotu'utu'u fekau'aki mo e sipoti ko'eni.

Na'e toe fakahoko 'e he ongoongo ni ha toe fetu'utaki kia Paea Wolfgram ke fakapapau'i 'a 'ene fakamatala ko'eni pea na'e fakahā 'e Paea koia pe ia. ‘Oku mahu’inga foki ‘a e vakai ‘a Wolfgram ki he tu’unga ‘oku ‘i ai ‘a e teuteu ki he sipoti he ‘oku ‘ikai puli hono taleniti mo ‘ene taukei kae ‘amu atu ‘a e makamaile na’a ne a’usia ‘a ia 'oku kei laukau ai ‘a e Tonga kotoa.

‘Oku hā atu foki ‘i lalo heni ‘a e komiti fokotu’utu’u ki he Sipoti pea ‘oku mahino pe ‘oku ‘i ai ‘a e fetongi ‘oku fakahoko makatu'unga 'i he liliu Pule'anga mo e ngaahi me'a kehe pe. Ko e kōmiti ‘ena na’e hā ‘i he tohi na’e fakahoko ki he Palesiteni ‘o e Kosilio Sipoti ‘a e Pasifiki Mr. Vidhya Lakhan ‘a ia na’e fakahoko ‘i he ‘aho 14 ‘o Siulai 2014 fekau’aki mo e tu’unga ‘o e fokotu’utu’u ki he sipoti pea na'e fakamahino atu ai pe 'a e kau memipa 'o e Komiti Fokotu'utu'u.

'Oku kau pe foki 'a e hingoa 'o Wolfgram 'i he Komiti Fokotu'utu'u 'oku hā atu ko'eni ka 'oku ne fakahā 'oku 'ikai ha toe fetu'utaki ange.

Lord Sevele-o-Vailahi (Chairman)

1. Mr Takitoa Taumoepeau, Secretary General, Tonga PGA (ex-officio)
2. Mr Sione Sisifa, Solicitor General, Crown Law Office (ex-officio)
3. Mr Semisi Sika, Business person and People’s Representative-Tongatapu II
4. Mr Andrew Minogue, Executive Director, PGC
5. Mr Paea Wolfgramme, National Sports person and former Olympian
6. Mr ‘Aholotu Palu, Acting Chief secretary and Acting Secretary to Cabinet
7. Mr Tatafu Moeaki, CEO - Ministry of Finance and Planning
8. Mr Ringo Fa’oliu, CEO – Ministry of Infrastructure
9. Mr Lopeti Senituli, CEO – Ministry of Internal Affairs and Sports
10.Mr Ross Chapman, Business person
11.Lord Tupou KC, Senior Law Practitioner
12.Fakahau Valu, National Sports person

Ko e kaveinga mahu’inga foki ‘a e sipoti ko’eni ki he fonua pea ‘oku ‘ikai foki ha Tonga ‘e loto ke hoko ha fakaevaha ‘i he teuteu atu ko'eni ki he sipoti ka ‘oku mahu’inga ‘i he taimi tatau ke ‘ilo ‘a e kakai ‘o e fonua ki he tu’unga ‘o e teuteu telia ‘enau ‘amanaki.