Fakataha Ki Hono Fokotu'u ‘Aketemī 'Akapulu Ma'a Tonga ^Featured

Ko e fakataha ko’eni na’e fakahoko ia ki he ‘Ofisi ‘o e Kautaha Lao Edwards ‘i Mataki’eua ‘i ha fengaue’aki mo e Kautaha Lao Edwards Law ‘a ia ‘oku nau fakafofonga’i ‘a e kautaha Essentially Group (NZ) ‘i Tonga ni.

‘Oku taumu’a foki ‘a e fakataha ni ke fokotu’u ha ‘Aketemī (Academy) ‘Akapulu ma’a Tonga. ‘Oku faka’amu ‘a e kautaha ni ke fakahoko ‘a e ngāue ni ‘i he kaha’u vave mai ni pē ‘o faka taumu’a ke ako’i mo teuteu’i ‘a e fānau taleniti’ia ‘i he faiva ‘akapulu.

Ko e kautaha ‘iloa foki ‘eni pea ‘oku ‘ikai sola kiai ha taha ‘i he māmani ‘o e ‘akapulu. ‘Oku nau nau pule’i mo fakafofonga’i (Agent) ‘a e kau va’inga ‘akapulu faka polofesinale pea ‘oku nau hoko koe pule ki he kau tangata ‘iloa ‘o hangē ko Richie McCaw mo Dan Carter ‘a ia ‘oku na lolotonga fakafofonga’i ‘a e Timi Hau ‘a e All Blacks.

Fakatatau ki he fakamatala ‘a Lou Thomson mei he kautaha koe peseti ‘e 70 ‘o e timi ‘a e All Blacks, peseti ‘e 70 ‘o e kau va’inga Super 15, peseti ‘e 80 ‘o e kau va’inga Nu’usila kotoa ‘oku nau va’inga ‘i muli ‘oku nau fakafofonga’i. ‘Oku nau toe fakafofonga’i foki mo e kau faiako tu’u kimu’a mo taukei ‘o hangē ko e kau faiako ‘Akapulu ‘iloa hangē ko Craham Henry, Wayne Smith, John Kirwan, Sam Joseph, Ian Foster mo e kau faiako ‘akapulu kalasi ‘uluaki tokolahi.

Na’e malava he fakataha ‘o e ‘aho ni ‘a e felingiaki fakakaukau mo e kau puleako pehē ki he kau faiako ‘akapulu ‘a e ngaahi ako’anga ‘a Tongatapu ni fekau’aki mo e kaveinga ni pea na’e hā mahino mai mei heni ‘a e poupou ‘a e kau puleako pehe ki he kau faiako ‘akapulu ‘a e ngaahi kolisi ki he fakakaukau ko’eni.

Na’e fehu’i foki ‘e Paula Fonua Puleako Kolisi Tailulu ‘a e ngaahi palani mo e fa’unga ‘o e ‘Akatemī ko’eni pea na’e fakamahino mei he ongo fakafofonga mei he kautaha ni ‘oku taumu’a ki hono teuteu’i, ako’i mo fakamaketi’i ‘a e fanau taleniti’ia ‘a e fonua ki Tu’apule’anga

‘Oku taketi’i ‘e he ‘Akatemi ko’eni ‘a e fanau ‘oku nau ‘i he ta’u motu’a koe ta’u 15 ‘a ia ‘oku fakafuofua ‘e kamata ‘aki ha toko 20 pea mei ai leva ‘a hono fakalakalaka ai pe ki mu’a honau tokolahi ‘o makatu’unga ‘i he palani mo e fokotu’utu’u ‘a e kautaha.

Na’e fakaha ‘e William Clive Edwards ‘oku nau fakafofonga’i ‘a e kautaha ‘i Tonga ni ‘i ha’ane lea fakafe’iloaki kimu’a ‘i he fakataha ko e kaveinga mahu’inga ‘eni ia pea ‘oku ‘i ai ‘a e ‘amanaki lelei ‘e hoko ‘a e vīsone ko’eni ‘o mo’oni he ‘e lelei ia ki he hakotupu ‘o e fonua. Na’e toe fakahā foki ‘e Clive koe ngāue ko’eni ‘e tu’u tau’ataina pe ia mei he Poate ‘Akapulu ‘a Tonga pehe ki he Pule’anga ka ‘oku taumu’a pe ki he fengaue’aki fakataha ki hono fakalakala’i ‘a e maa’imoa ‘akapulu ‘i he fonua.

Na’e fakamatala ‘a Kalafitoni Latu Puleako Kolisi Tonga ki he ki’i ‘Akatemī‘a e Kolisi Tonga kuo a’u ‘eni ki he toko 60 kuo nau ‘oatu ki Nu’usila mo Siapani pea ‘oku tokoni lahi ‘eni ki he kaha’u ‘o e fanau. Na’e toe fakaha ‘e Patele Seluini ‘Akau’ola koe ngāue tatau kuo kamata ‘i he Kolisi ‘Apifo’ou pea ‘oku hoko ‘a e ‘amanaki ngāue mai ‘a e kautaha lahi mo ‘iloa ko’eni ki Tonga ni he fakaloto lahi ki he’enau ngāue.

Na’e poupou ki heni ‘a Mr. Simon Porter mei he kautaha pea na’a ne fakahā ‘oku tau’atāina pē ‘a e ngaahi kolisi ka koe ‘Akatemī ‘oku nau taumu’a kiai ‘e fetokoni’aki mo e ngaahi ako pea ‘e me’angāue’aki ‘a e ‘iloa, ivi fakapa’anga mo e taukei ‘a e kautaha ke ‘unuaki ‘a e faiva ‘akapulu ‘i he fonua ni.
Na’a ne toe fakahā foki ko’enau ‘i Tonga ni ke fanongo ki he tokolahi taha tenau ala lava he ‘e tokoni lahi ia ki he ngāue ‘oku nau teuteu fakahoko. Na’a ne toe fakahā foki koe ngāue tatau kuo ‘osi fai hono fokotu’utu’u ki Ha’amoa mo Fisi.

Na’e faka’osi ‘aki ‘a e fakataha ha lea poupou mo fakamālō ‘o fakafofonga’i ‘a kinautolu na’a nau fokotu’utu’u ‘a e fakataha pea na’e fakahoko ia ‘e Dr. Viliami Latu pea toki faka’osi ‘aki ha lotu ‘e Pātele Seluini ‘Akau’ola.