Kei momoko Utah Warriors: Matapoto All-Blacks malolo, Rene Ranger, Tata'o tu'o ua ^Featured

DENVER, COLORADO (March 01, 2020) – Lolotonga ‘a e kei faka-māfana ‘a e Utah Warriors (1-1-1) ‘i he ‘enau fepaki mo e Colorado Raptors (0-3), kuo matapoto ‘enau tangata All-Blacks mālōlō ko Rene Ranger (#!2) ‘o tata‘o tu‘o ua fakaholoholo kenau mālohi ai, 22-14.

Kuo ‘osi fakapo‘uli ‘a e pule-faiako ‘a e Warriors, Chris Latham, mei he ‘enau kamata fefeka ‘i he uike ‘e tolu kuo hilí, ka e foaki ‘a e mālohi ‘i he miniti faka‘osí. Kuo nau kamata momoko ‘i he uiké ni ‘o nau muimui kai ‘i he mālōlō, 8-0, pea faingata‘a hono feinga‘i ‘o e tulikaí.

Na‘e ‘ohofi fefeka tokotahá pē ‘e he fu‘u siana All-Blacks mālōlō, Rene Ranger, ‘a e koló ‘o ne kakalo holo pea tohoatu ‘a e kau tēkolo ‘a e Warriors ki he laine tata‘ó. Ko ‘ene tata‘o tu‘o ua hokohoko, ‘uluakí ‘i he miniti 30, mo e miniti 60. ‘Alu hake ai ‘a e taki kai ‘a e Raptors, 15-0.

‘AHO ‘APULU KI HE #10              

Pea toe hoko ko e ‘aho faingata‘a ki he feesi ‘a e Warriors, Hagen Schulte (#10). Neongo ‘ene taki kai mā‘olungataha ‘i he MLR ‘i he ‘uluaki uike ‘e 3, na‘e ‘ikai ke hū ‘ene ‘aka tautea tu‘o ua ‘i he ‘uluaki tu‘ú. Ka e a‘u ‘o ma‘u kelekele lelei ‘e na ‘aka fakatō mo e le‘okoló, Robey Povey (#15), na‘e kei ‘apulu pe ‘enau feinga ‘ohokaí.

Faifaiange pea toki malava ‘i he miniti 75 ‘o avangi ‘e he talilavea matatolu, Huluholo Mo‘ungaloa (#17), ‘o mapaki mei he molo mei he mita-5 ‘o e Raptors ‘o tata‘o. Pea ‘akahi ‘e Povey ‘a e poini-2: ‘o nau tuli kai hake, 15-7. Ka mei he ‘enau tali ‘aka hokomaí, hangehangē tenau toe tata‘ó, kuo fa‘oa ‘e he Raptors ‘a e pulú ‘o fakafoki ‘e Mason Emerson ki he laini tata‘o ‘a e Warriors, pea hū mo e ‘aka poini-2: taki ‘a e Raptors, 22-7.  

KEI SI‘ISI‘I, PEA TŌMUI

Pea uike hokohoko eni ‘e uá – lolotonga ‘a e fakalōloa taimi laveá –  na‘e holoholo tangata ‘a e ‘ohofi ‘e peleki‘auei talilavea, Saia ‘Uhila (#20), ‘a e kolo tata‘ó, pea ‘akahi ‘a e poini-2 ‘e Povey. ‘O tu‘u ai e kaí: 22-14, ki he Raptors.  

‘E toe folauatu ‘a e Warriors ‘i he uiké ni, ki Seattle ia ‘o fepaki mo e Seawolves. Na‘e toki ma‘u ta‘ovala ‘a Seattle ‘i he uike kuo ‘osí, ko e mālohi ‘e 1, ulungia ‘e 3. ‘Oku ‘ikai ke fu‘u maumau lahi ‘a e tu‘unga ‘o e Warriors kia faiako Latham mo e kau tangatá. Kā ‘e leleiange kenau fokimai mo e ikuná, ka e ‘oua na‘a ko e kamata eni ‘enau toutou ulungia. 

‘Oku nau kei fika 2 mo e poini ‘e 7. Ko e takí ‘o e Konifelenisi Hihifo ko e San Diego Legion, ‘oku nau kei haohaoa (4-0), mo e poini ‘e 19. ‘Oku taki ai foki ‘e he tu‘ukimu‘a All-Blacks mālōlō ko Ma‘a Nonu. Ko e taki ‘o e Konifelenisi Hahaké ko e Toronto Arrows (4-0), mo e poini ‘e 17.     

Ngaahi Ola Uike 4: 

Colorado Raptors, 22; Utah Warriors, 14

New York, 31; Houston TX, 23

Toronto Arrows, 28; Rugby ATL, 18

Seattle Seawolves, 44; New England, 29

Washington DC, 28; Austin TX, 19